Dalam

"Dalam..."

Hekk bdejtha l-poeżija nkwetanti tal-bieraħ. Poeżija li frankament ħadd mhu ser jinteressah jaqra.
Għax x'jinteressah il-bniedem minn bniedem ieħor meta dinjietu hija biżżejjed miżgħuda stejjer u rakkonti.

Hawn biss dlam...

Fost tbissim irreċtat bla ħadd jissuspetta l-bikja wiesgħa taħtu, kulħadd kuntent, kulħadd ferħan.
Fost rutina marida li tistħajjilha bħal kankru kiefer, tirkeb fuq fjur kull uman, u tnaqqru bla ma jinduna.
Fost ideat sfurzati, konsum ta' flus.
Fuq drone ninnota s-sajf miġnun, mgħobbi kondoms użati u nisa attrajenti, nofshom diġà tqal. Minjaf x'inhu l-aħjar?

Kantanta tistona, tfajla tinża, tmiss lilha nfisha, u jien inpenġi jew nikteb il-ħolma fis-siegħa u għoxrin ta' filgħodu. Infittex sens, jew ġenn. Infittex xi ħaġa ċara.

Mill-Luxol sa Firenze

Fi triqti mill-istazzjoni lejn iċ-ċentru ta' Firenze kelli kunflitt ta' ħsibijiet: bejn l-eċitament li daqstant tard f'ħajti ser immiss ir-realtà ta' din il-belt tant maħbuba fost dawk li jħobbu l-arti iżda wkoll kemmxejn ta' biżà mill-fatt li fi ftit ħin dik l-immaġini idealiżżata ta' belt meraviljuża setgħat tisfaxxa fix-xejn. Għal mument l-immaġinazzjoni u r-realtà lletikaw b'qilla sħiħa ġewwa fija.

F'dawk il-passi bdejt nirrealiżża kemm għalkemm mingħalija "naf ħafna" dwar l-arti, biss ma kontx naf x'qed jistennieni wara dawk l-ewwel ħitan. Lura xi snin ilu diġà kelli nkun hemm biss għal xi raġuni jew oħra, jien u Stephanie konna għamilna bookings ħżiena! Oħti bdiet tirrakkuntali x'kien ġej għalija imma jien, dieħel ġo dik il-ħolma li ħlomt spiss u li issa kont ser nikxifha, bħal qishom ingħalquli widnejja.

Bħalissa ninsab hawn lura f'kamarti ġewwa, jew aħjar, fuq l-għatba tal-isbaħ belt fid-dinja iżda l-memorja ta' Firenze għadha tberren bi ħlewwa waqt li nisma l-melodija ħelwa, b'xi kliem kemmxejn patetiċi, ta' 'Firenze Santa Maria Novella' ta' Pupo. Laqtuni numru ta' affarijiet minn din il-belt.

Il-kelma ideali hija 'sakra'. Tgħoġobni l-kelma 'sakra'. F'Firenze trid tkun lest tisker bl-arti sakemm anki tasal tmur f'rokna tirremetti u terġa tmur tisker… L-ewwel sakra lili ġietni hekk kif wara l-mixja mill-istazzjon għal Via dei Calzaiuoli, sibt il-Katidral ta' Santa Maria del Fiore hemm, quddiemi, ġigantesk, goff, kważi kważi jmur lil hinn minn kull proporzjon li l-uman jista' jitħadded dwaru. Spiċċajt b'ħalqi miftuħ, forsi bħal meta kien skorja Totti kontra s-Sampdoria snin ilu. Bqajt b'ħalqi miftuħ ukoll quddiem il-Bisteccha Fiorentina tat-'Trattoria Angiolino', irrakkomandata b'saħħa minn sieħbi Gabriel. L-istess effett kellu l-ġelat tal-ġelaterija GROM kif irrakkomandat minn sieħbi Simon.

Bħal dejjem, fittixt li nsib lill-poplin fil-belt iżda nammetti li ma kinetx xi ħaġa faċli hawnhekk. Għalhekk ukoll, il-kunċert spettakolari ta' Lorenzo Cherubini, a.k.a. Jovanotti fl-istadjum tal-Franchi, tani nifs. Hemm stajt induq togħma tajba tal-poplu Fiorentin. Nammetti li qam ġismi xewk xewk nismahom ikantaw il-kanzunetta ta' Pupo b'vuċi waħda qabel ftuħ il-kunċert.

Jovanotti? L-aħħar li kont rajtu kien fil-Luxol wara Limestone Kick. Illum immatura aktar. Joffri spettaklu komplut. Jovanotti jirnexxielu jgħaqqad l-arti tal-mużika ma' dik kontemporanja viżiva kif ukoll element qawwi ta' teatru u film. Il-mużika u speċjalment il-kitba ta' Cherubini tgħaddili ħafna enerġija u nħoss li dan il-mument għeni nerġa nispira ruħi sabiex inġib lura dak li ħaddieħor qatel fija.

"Abbiamo confidenza con i demoni interiori
sappiamo che al momento giusto poi saltano fuori
ci sono delle macchine che sembrano un miracolo
sappiamo come muoverci nel mondo dello spettacolo
eppure ho questo vuoto tra lo stomaco e la gola
voragine incolmabile
tensione evolutiva
nessuno si disseta ingoiando la saliva
Ci vuole pioggia, vento
e sangue nelle vene
pioggia, vento
e sangue nelle vene
e una ragione per vivere
per sollevare le palpebre
e non restare a compiangermi
e innamorarmi ogni giorno ogni ora ogni giorno ogni ora di più"

Fl-aħħar jiem ġewwa Firenze, laqtuni żewġ graffiti li kienu jgħidu xi ħaġa tipo "Fermate la città vetrina" u "Occupa le case". Messaġġi li bħal qisu kkonfermawli li dak li ħassejt tul dawn il-ħamest ijiem kien minnu: filwaqt li Firenze hija belt li ma tħallilekx għażla ħlief li tisker fl-arti, fil-perfezzjoni arkitettonika, skultura u maestrija, ma tgħamililekx faċli ssib lir-ruħ tal-Fiorentini tal-llum. Bil-flus xtrajt il-biljetti biex stajt nidħol l-Uffizi u anki l-Galleria dell'Accademia. Bil-flus u bi stennija fi kjuwijiet twal tista' tgawdi l-arti klassika, dik istituzzjonaliżżata imma lill-poplu Fiorentin trid tistinka biex issibu. Skantajt kemm nies lesti jqattgħu siegħat twal fil-qilla tax-xemx sabiex jidħlu jieħdu selfie ma' David jew jqattgħu ħames minuti quddiem it-'Twelid ta' Venere' ta' Botticelli. Mumenti sbieħ tara dawn il-klassiċi quddiem għajnejk u tiskopri oħrajn li forsi qatt ma tkun smajt bihom iżda nasal naqbel li Firenze hija kemmxejn ta' vetrina fejn l-istituzzjoni tal-arti tinħass aktar mill-espressjoni libera tal-poplu. Nistħajjel li huwa diffiċli għal artist kontemporanju li ma jħossux fgat minn tant tjubija tar-Rinaxximent. Ħadt gost ninduna li kien hemm l-proġett 'Human' ta' Gormley għalkemm ma sibniex ħin immorru narawh. In-nuqqas tal-kontemporanju lokali f'belt daqstant kbira jinħass u nħoss li huwa argument importanti f'kuntest ta' belt tant sinjura b'arti li għamlet x-xorti tal-Ewropa u anki tar-razza umana. Nittama li għandi żball, filwaqt li nestendi l-argument għal fuq il-Belt tiegħi.

Ħadt gost inżur xi bottegi u nibda' diskursati ma' ħaddiema jew imprendituri ta' ħwienet. L-arti hija dik li sseħħ ta' kuljum minn dawn in-nies. Fost dawn insemmi lil Michele ta' Move On | Finest Beer Best Vinyl, lit-tlett tfajliet ġewwa Quelo Bar, lill-Contempo Records, lill-bottegi tal-ġilda ġewwa l-Bażilika ta' Santa Croce, lix-xufiera tal-varji 'buses' u lill-ħaddiema fit-Trattoria Gustoleo. Il-graffiti, fil-maġġoranza artistiċi, li jitħallew tul it-toroq ukoll huma sinjal tal-poplu tal-llum.

Forsi huwa mpossibbli ssir taf belt b'daqstant storja f'ħamest ijiem aħseb u ara lil niesha imma ma nistax niċħad li sirt inħobb lil Firenze xorta waħda. Belt miżgħuda bi sbuħija li ironikament għandha bżonn rinaxximent; twelid ġdid f'dak li huwa llum biex hekk kif diskuss f'dan l-artiklu, ma tkunx belt mużew imma belt ħajja bit-Toscani u t-talenti kontemporanji tagħhom.

Ngħidu Iva

Nibqa' ngħid li dik l-imbierka mistoqsija tar-referendum hija kruċjali fid-dinamika psikoloġika tal-vot. Fiha nfisha, timbuttak tivvota favurha. "Taqbel li nixtrilek ġelat?" bla ma trid tħajjrek tgħid iva... iżda "Taqbel li nevitaw ġelat illum?" tindikalek li min qed isaqsik għandu ntenzjoni jurik li dak il-ġelat jaf ma jkunx ta' ġid għalik fl-okkażjoni. L-istess dawn l-imbierka referendi.

Huwa appuntu għalhekk fejn dejjem emmint, u għadni nemmen li, 'l bogħod minn dak li tgħid il-liġi bażwija, quddiem mistoqsija hekk, dawk li jastjenu għandhom jiġu msarrfa f'vot li żgur mhux jgħid "iva". Meta fl-uffiċju xi ħadd jistaqsi "min irid café?", dawk li jibqgħu siekta, xorta jibqgħu bla café! Sempliċi le? Imma sfortunatement, il-liġi tmur oltre is-sens komun u sempliċi.

Imsomma, quddiem din l-ambigwità, reġa rebaħ l-IVA, rebħet l-injoranza ta' poplu mhux edukat (ministru please note) u l-biżà tal-għeżież politikanti ggranfati ma' kull vot! Rebaħ ukoll sieħbi Wayne li ftit ġranet ilu nebbaħna bil-profezija traġika ta' Fantozzi fuq din Malta:

Rebaħ ukoll il-faqar ta' kampanja xotta kontra dan il-vot. Kampanja bl-ingliż li klassifikat lilha nfisha l'bogħod mill-Malti tipiku. Waqt li kellha timbotta il-"LE', din il-kampanja mbuttat "SHout". Napprezza jekk Anġelik inebbaħni biex nifhem x'kienet l-istrateġija.

Rebaħ ukoll il-faqar tal-artist Malti li jisparixxi meta jkun hemm bżonn vuċi kreattiva u friska li twassal messaġġ politiku. Kien biss Trevor Borg bi 'Crossfire' li ssogra jitniffes u jinstiga mistoqsijiet. Nittama li għandi żball hawn!

U issa qegħdin hawn, illum 12 t'April 2015, jum għażiż għal żewġ persuni mportantissimi f'ħajti u li naf li jinsabu mbikkma b'dan ir-riżultat. Ħasra. Xtaqt, anki għalihom li jkun jum differenti!

Ngħalaq billi ngħid "grazzi Joseph" u "grazzi Simon" għal dan ir-rigal nazzjonali. Nittama li fil-monument figurattiv li għad jghamlulkom mas-sett meraviljuż quddiem Kastilja, il-ħamiem Belti jsib fejn jistrieħ u jserrraħ biżgħatu mit-tiri tal-kaċċa fir-Rebbiegħa.

Ħa nikkonsla billi nara lill-Fantozzi ta' Malta (għax hekk jismu l-video fuq YouTube!).

Napoli, rakkont dwar Napoli

Napli, Napli, Napli. Dik il-kelma bħal pendlu, jitbandal fl-infinit, joqrob, umbagħad jitbiegħed; bla heda; għal dejjem. U hekk reġgħet ġiet u telqet esperjenza oħra fil-belt il-maħbuba. B'ħafna xebħ ma' belti, Napli serqitli qalbi u kif dejjem kont avżat, tatni iktar milli kemm kien mingħalija sejjer ngħati.

Illum, wara s-sitt mawra f'din il-belt u il-kaos ħlejju tagħha, nistaqsi x'inhu dak li jimla' 'l qalbi meta nirfes dik l-art. Issuspettajt li forsi kien kollu sforz nostalġija tal-esperjenzi passati ta' volontarjat ma' tfal u żgħażagħ Naplitani. Iżda le. Issa naf li m'huwiex hekk.

Napli hija l-personifikazzjoni tal-arti fejn fil-forom sbieħ u koroh ta' dak li l-bniedem jaf joħloq, tieħu forma l-ħajja. L-ifjen senswalità u sbuħija jgħixu id f'id ma' kruha eżasperanti. Il-melodija tmelles widnejk u tiżfen mal-ħsejjes iżarrtu tal-muturi ġerrejja jħokku ma' sormok. Il-ġenn fit-toroq tistħajjlu f'konverżazzjoni kontinwa mas-sliem fis-sotterran modern. F'Napli jiltaqgħu l-baxx u anki l-għoli tal-bniedem. L-injoranza mgħannqa mal-ġenju; il-faqar mal-ifjen ġojjell; il-vjolenza ta' qalb silġ issibha għaġna waħda mal-imħabba espressa fuq kull ħajt, u kull skoll li jmiss mal-ibħra f'Mergellina.

Napli. L-ewwel belt stranġiera li laqgħetni fiha bit-tgħajjir, daqqiet ta' sieq u l-isfida tal-mibki, ċkejken, Luigi, iżda li kuljum tpattili b'emozzjoni kbira u taħlita ta' dmugħ u ferħ. Napli tfakkarni li l-ħajja fiha sens li tgħixha, hekk kif inhi; qalb in-nies, bl-arti tfewwaħ imżewwqa minn idejn pizzar u bit-theddida kontinwa ta' vulkan.

Konverżjoni

'Konverżjoni'

Intriganti din il-kelma. Speċjalment għal Pawlin, illum fil-25 ta' Jannar. Skond id-dizzjunarju ta' Aquilina, din il-kelma tirreferi wkoll għal bidla, eżempju, ta' flus jew direzzjoni fiżika.

Sforz ir-reliġjon u l-kultura artistika li kbirna fiha, ix-xena tal-konverżjoni ta' Sawlu dejjem rajniha bħala mument kważi kważi eleganti jew l'iktar l'iktar drammatiku. Biss, ftit minuti ilu wara li qrajt l-istatus ta' Facebook ta' sieħbi Stephen Baldacchino li ftit jiem ilu kien involut f'inċident tat-traffiku ikrah ħafna, ħsibt ftit dwar xi jkun mument li tassew jibdillek ħajtek ta' taħt fuq.

L-ewwel ħsieb imur fuq dawk il-kompożizzjonijiet artistiċi li ninduna kemm huma wisq 'l bogħod minn realtà. Anki riċerka sempliċi fuq Google, ressqitli riżultati li ġabuli tbissima, iżda fl-istess ħin aktar spunti ta' riflessjoni... Hawn huwa eżempju:

Żgur li waqgħa minn fuq żiemel mhix daqshekk komposta kif irrakkuntaha Caravaggio. Nixtieq nimmaġina lis-suldat Ruman Sawlu jittajjar minn fuq żiemel (jew żieme ?) sfrattat u jinstabat għal wiċċu mal-art bla ebda grazzja. Minjaf forsi kiser kisra idu, tilef xi sinna jew spiċċa b'xi daqqa f'għonqu jew dahru li baqa' jħossha fix-xhur ta' wara. Naħseb xenarju iktar realistiku żgur. Xenarju ta' iktar 'impatt' fil-veru sens tal-kelma. U appuntu hemm fejn inqabbel l-inċident ta' Stephen ma' episodju goff u li jaħsad.

Stephen kiteb:

"Il-Mulej jinqeda b'ħafna okkażjonijiet u ċirkustanzi biex jerġa' jgħaqqadna miegħu. Uħud minnhom anka kemm xejn skomdi u forsi wkoll xi ftit diffiċli. Ħassra li mhux dejjem nindunaw li Hu jkun daqstant viċin tagħna! ...meta nindunaw, m'hemm xejn isbaħ li niftħulu l-bibien ta' qalbna u nħalluh jimlina bl-ispirtu divin tiegħu..."

Issa lil hinn mill-kuntest reliġjuż, li bħalissa mhux li huwa tant preżenti f'ħajti minħabba l-wisq firdiet li jġib miegħu, inħoss illi konverżjoni hija, appuntu, dik li tiftaħlek għajnejk biex tibda tifhem dak li kont għadek ma fhimtx għalkemm kollox kien ċar u tond quddiemek. Konverżjoni hija meta tiddeċiedi li għalkemm pruvajt kollox, iċċedi, tgħannaq emozzjoni diffiċli u b'imħabba tlebbet lejn triq ġdida. Konverżjoni ġġib magħha ħafna feriti, uħud gravi, uħud ma jfiqux... fiżiċi, mentali jew emozzjonali... imma ġġib ukoll nifs ta' ħajja ġdida. F'mumenti ġġib sodisfazzjon u paċi. Ġġib opportunità ġdida...

Dal jum f'hekk qed niftakar u naħseb. Il-bżonn li ngħixu l-waqgħa b'mod komplut, kważi kważi daqs li kieku hija rigal. Imma forsi jien iblah... ma nafx. Forsi nifhem aħjar fis-siegħat u ġranet li ġejjin. Intom x'taħsbu?

L-2014 f'mużika

Ħajti dejjem kienet ittimbrata mill-mużika. B'xi mod jew ieħor, sors jew ieħor, ħajti nista nirrakkuntaha f'diski li akkumpanjawni. M'inix dilettant tal-films u l-kotba, bi sfortuna kbira, iraqqduni. Nista' ngħid li f'ħajti 'qrajt' infinità ta' stejjer miktuba għall-finijiet mużikali. Meta kont qed nitfarfar kont fortunat li ltqajt ma' ħafna mużika b'messaġġi pożittivi u li għallmuni nibni fiduċja fija nnifsi u nħobb kemm niflaħ. Aktar 'l quddiem sibt awturi li rrakkuntaw ħajjithom b'enerġija u profondità liema bħalha - fejn ma sibtx kliem jien, dawn kważi kważi rnexxielhom jiktbu stejjer li bħal donnhom irrakkuntaw ħajti u s-sentimenti tiegħi. Kull kanzunetta ngħoddha daqs ktieb. Kull album, librerija.

Fir-realtà tal-llum l-inkontru mal-mużika huwa fuq livell emozzjonali. Illum naf li anki l-mużika nnifisha hija 'kitba' li tirrakkonta sensazzjjoni. L-"uġiegħ" li kien isemmi l-Gaġġu lura fl-2002 illum hija lingwa li nsib aktar komda minn dik tal-ilsien nazzjonali. Lura fl-istess żminijiet, is-Sur Alfred Camilleri kien qalilna "tibżgħux tammettu li intom artisti". U hekk hu. Illum kburi li fhimt u snin ilu aċċettajt din il-'kundizzjoni'. Kemm hi sabiħa din il-lingwa! U kemm hu sabiħ meta ssib mumenti fejn din il-lingwa hi mitkellma.

Is-sena 2014 nista' nirrakkuntaha f'numru ta' kanzunetti:

Ateliota Hrisanthema ta' K.BHATA
Diska li kienet ixxerjata fuq Facebook mill-kollega Griega, Maria. Meta smajtha, xi ħaġa fija ġara. Bħal ħassejt li sibt ħoss u rakkont li jitbandal bl-istess ritmu ta' qalbi. Għalkemm il-lingwa mitkellma ma stajtx nifimha, dik tar-ruħ u tal-qalb, fehmet kollox. Filfatt, tlabt lil Maria tieħu paċenzja bija u tgħamilli nterpretazzjoni għall-Ingliż. Bqajt sorpriż mhux ftit meta rrealiżżajt x'kien ir-rakkont f'din id-diska u ma stajtx inżomm id-dmugħ. Saħansitra ddeċidejt li ngħamel interpretazzjoni għall-Malti, li sabet ruħha, mill-ġdid, fuq Facebook.
It-titlu ta' din id-diska għażiża issa jinsab imberfel ukoll fuq il-karozza tiegħi, bit-tama li xi darba anki jien ngħix f'għelieqi bla tmiem ta' kriżantemi.

Heard About You Last Night ta' Mogwai
Il-ħolm huwa dak li jżomm lill-bniedem ħaj. U appuntu din id-diska li tiftaħ l-aħħar album tal-band tant għal qalbi, Mogwai, apparti li tinstema bħal soundtrack ta' ħolma, kienet akkumpanjament għall-ħolm ta' din is-sena. Mill-karozza għal fuq Spotify; mill-earphones fuq ix-xogħol sal-headphones f'nofs ta' lejl, mill-laptop għal fuq il-mobajl. F'din il-mużika sibt rilassament fi żmien il-kitba tat-teżi u sibt ukoll mezz kif nifhem lili nnifsi fil-paċi u mhux fil-konfużjoni. F'dil-mużika ħlomt bil-maġija u emmint li nista' ngħix l-impossibbli. Hekk kif beda l-kunċert ta' Mogwai f'Ruma u nisma dawk l-ewwel ftit noti, ma stajtx ma nħossx dexha tiela ma' ġismi kollhu. Mument maġiku tassew!
Użajt it-titlu ta' din id-diska bħala titlu għal rakkont qasir minn tiegħi li jinstab hawn.

Formidable ta' Stromae
Matul din is-sena ġraw affarijiet tassew formidabbli u li sa dan il-ħin li qed nikteb, ma nistax nispjega, għalkemm pruvajt. Il-kliem qatgħu qalbhom u anki l-arti. Baqa' biss qalbi tħabbat u tixxennaq li għadha tista' tgħum f'tant lussu. Sa minn meta smajtha l-ewwel darba waqt Sanremo din id-diska fissret wisq!

Sete ta' Saluti da Saturno
Kien album li rċivejt bħala rigal mingħand il-kantant Mirco Mariani. Album li akkumpanja l-ewwel xhur tas-sena b'ħafna tjubija u kebbes fija enerġija li kont tlift fis-sena ta' qabel. Sete filfatt titkellem dwar tfittxija u stennija nfinita għal dik li tixgħel il-ħajja. Album li wasal b'sorpriża u li niżel għasel bħal tazza ilma frisk f'nofs deżert.

L'Abitudine di Tornare ta' Carmen Consoli
Ir-ritorn tal-kantantessa ma nistax ma niċċelebrahx wara stennija ta' ħames snin. Carmen dejjem kitbet rakkonti li għallmuni ngħix u nifhem kif għandi nħares lejn il-ħajja... b'imħabba imma b'rispett lejja u lejn il-prinċipji fundamentali tiegħi.

Out of the Black ta' Royal Blood
L-iskoperta ta' qabel tal-aħħar. Fiż-żmien meta ridt insib ftit saħħa, sibt din, grazzi għal share li għamel sieħbi Davide mill-istess album. Jien bħas-soltu, ridt nisma l-album kollu u din, l-ewwel track, rebħitli qalbi.

I Lived on the Moon ta' Kwoon
L-aħħar skoperta dis-sena. Imma x'effett! X'paċi ġabitli! Bħal qisu xi ħadd ġie jwennisni f'mument fejn intfajt nibki taħt siġra f'nofs foresta kiesħa.


Diski oħrajn li ħaqqhom grazzi:

Shine ta' Madrugada
Rapsodia Satanica ta' Giardini di Mirò
Lover, You Should've Come Over ta' Jeff Buckley
Luna ta' Verdena

Mawra f'Ruma

Jgħidu li kollox għandu tmiem. Biss ċertu tmiem jħalli wisq togħma tajba biex ikun jistħoqqlu jissejjaħ hekk. Għaddiet ukoll din il-mawra qasira fil-belt eterna ta' Ruma. L-Italja, bid-difetti kollha tagħha tibqa' ġenna tal-art f'għajnejja. Art fejn issib il-kultura magħġuna mal-poplu. Art fejn issib il-passat, il-preżent u l-futur. Fejn sibt ftit kulur.

Minn platt amatriciana, għall-ġelat taz-zabaione. Miċ-ċentru storiku mdawwal, għall-periferija mdallma; kważi kważi, diżabitata. Minn tfajliet u ġuvintur jarmu s-sbuħija għal nisa u rġiel jitħabbu mal bankina. Minn knejjes b'arti sagra, għal mużewijiet b'arti, għal ħafna, profana. Minn stabbilimenti li jbiegħu l-ferħ kosmetiku, sa oħrajn li jbiegħu ħsieb profond. Mill-pixxatur ta' Duchamp għall-latrini sofistikati tal-ajruport. Minn Minn toroq imdaħħna b'karozzi mgħaġġlin, sa ġonna wiesgħa miżgħuda gawwi u tħaxwix is-siġar. Minn Kahlo, għal Heckel, għal Keats, għal Pawlu ta' Tarsu, għal Spalletti, għal Rodin, għal Mogwai.

Żgur li l-akbar emozzjoni kienet ilbieraħt lura, meta fuq dak il-palk fl-awditorju ta' Piano, tfaċċaw Mogwai, introduċew lilhom infushom bħala band minn Glasgow u nfexxew idoqqu Heard about you last night, segwita minn Friend of the Night. Illami! Kif tista żżomm lill-qalb milli tħabbat tnax tnax, lid-dmugħ milli jitfaċċa u lix-xewk xewk milli joħnoq ġismu kollu, kull sekonda, ma' kull nota!?  "Grazie, thank you, cheers" kienu l-kliem ta' Braithwaite bejn kull silta u oħra... tant li kien hemm min ironiżża bill-sejjaħlu "chiacchierone". Sittin minuta, jew ftit aktar, ta' emozzjoni pura qalb folla entużjasta daqsi u aktar minni.

Emozzjoni oħra żgur li kienet il-mawra sal-Katidral ta' San Paolo fuori le mura. Ma nafx x'fatta iżda hekk kif kont hemm, quddiem dik il-biċċa ġebla li timmarka qabru f'katidral lussuż, ħassejtni kalm, kważi żżejjed. Erġajt fakkart lili nnifsi f'dan ir-raġel li aċċetta bidla f'ħajtu u għal raġuni, li nafu naqblu jew ma naqblux magħhom, għamel vjaġġi meraviljużi biex jentużjażma lil ħafna popli. Tassew ispirazzjoni sabiex anki nirrifletti dan kollu fuq il-vjaġġ tiegħi illum, jien li xi ħadd sejjaħli "Pawlu ġdid".

miktuba lura f'Awissu 2014

Żieme

Bħal fi Trojja, tfaċċa żiemel f'Belti u ġab miegħu nvażjoni. Bħal fi Trojja, l-installazzjoni "Żieme" inħbiet wara l-idea ta' monument, biss l-essenza ħarġet inkiss inkiss, infiltrat fid-djar u fl-imħuħ u nażżarda ngħid li anki din id-darba, il-gwerra ntrebħet.

Xi gwerra hi li ntrebħet?

Gwerra hija magħmula minn battalji u appuntu l-lista ta' battalji li ġew miġġielda kienu numerużi. Battalja kontra l-injoranza. Battalja kontra l-aljenazzjoni. Battalja kontra l-kunċetti estremi Nazzjonalisti u Soċjalisti. Battalja kontra l-għażż. Battalja kontra s-soffokazzjoni artistika u kulturali. Battalja kontra l-formalità politika. Battalja kontra l-ipokrezija reliġjuża. Battalja kontra l-ġaħan. Battalja kontra l-aristokratiku kollu pompa.

B'Żieme, l-artist u ħabib tiegħi, Austin Camilleri, irnexxielu jaħsadna u jekk lis-suġġett tiegħu ħallieh fuq tlett saqajn, żgur li lilna qabadna fuq sieq waħda. Kemm l-iktar mistoqsija sempliċi iżda anki dik l-aktar akkademika, tistħarreġ is-saħħa u l-istabbiltà ta' dik il-kreatura familjari, mhux aktar rikonoxxuta, u b'identità maħsuda sforz nuqqas evidenti u forsi makabru.

miktuba lura għal ġranet tal-inawgurazzjoni

L-infinit

Huwa f'ċertu ħars li jintlemaħ jew jinħeba l-infinit. Hekk ikantaw Battiato u Consoli. Jistaqsu kif tista' ma twerżaqx dak li l-univers jorbot ma' rwieħna f'għaqda minsuġa bil-ktajjen?

Fil-forma ta' kliem u l-kumbinazzjonijiet ta' bejniethom, fid-daqqiet tal-pinzell diġitali, jien inwerżaq. Inwerżaq. Inwerżaq bħall-karozza arroganti li taħsad is-skiet ta' triq siekta. X'ħin tarani sieket, jien qed inwerżaq. Fid-dlam, qabel il-lejl jifrex liżar fuqi, iftaħ widnejk u tismagħni nwerżaq. Meta mal-ħobż tal-kexxun fit-towster titla’ xemx ġdida, ieqaf, neħħi minn idek u ismagħni nwerżaq.

Il-ħsieb u l-kliem joħorġu jilgħabu mal-lejl. Jiġru u jitkaxkru mal-art, qalb trabijiet, għadajjar t'ilma u karozzi pparkjati. Bħal missjunari jew forsi lagħaba bla fejqan jibqgħu isostnu l-fidi tagħhom b'ostinazzjoni. Jittajru kliem u ħsibijiet fi bżieżaq, fl-arja tiegħek u jiżżeffnu mar-ruħ bil-moħbi. Dak il-moħbi li ftit jażżardaw jitkixxku fih... ħlief int. Int taqbeż f'dak il-moħbi mimli tempesti, bluha u ħoss l-orkestri.

Nidħak waħdi b’għajnejja b’nitfa dmugħ, meta ma nifhimx għalfejn inwerżaq. Jekk l-univers jarmi l-ktajjen, jien niżloq, jien immut. Jekk l-univers ma jsallabnix, jien ma nerġax inqum wara tlett ijiem. Għalhekk kull lejl jiftaħ separju fuq destin diżorganizzat; imċajpar; u bir-ritmu tal-lastiku fuq il-wiċċ tal-karozza, jaħsel ħuġbejja b’emozzjoni biex l-infinit jerġa’ jagħmel sens. Biex meta tpoġġi fjura fuq qabri, tismagħni nwerżaq.

Ispirata minn din. Miktuba għal dik.

Ħarba

Nixtieq naħrab, nivvjaġġa bħal żrara maqbuda maqrusa mal-lasktu ta' rota ta' karozza. Imqar tkaxkira fuq l-asfalt, imma naħrab...

Pittura ta' Virginia Broersmal

Naħrab minn mistoqsijiet li jwelldu risposti li jweġġgħu. Naħrab minn silenzji banali, u kliem vojt li jirbumbjaw iktar minn żaqq balena fuq dieta stretta. Naħrab minn qalbi... naqlagħha, inħalliha warajja, forsi jgħaddi tifel, jaħsibha ballun u jixxuttjaha għal għonq it-triq, sakemm forsi buffura riħ tkaxkarha sal-port u tgħarraqha f'baħar, qalb il-fdalijiet ta' vapuri u bombi tal-gwerra. Jew qalb flixken tal-plastik li tbewwsu ma' tant xufftejn għall-kuntrarju tagħha.

Naħrab minn ġismi u dil-forma, difettuża, xejn interessanti. Naħrab f'art mingħajr toroq u hemm naħbi moħħi u ħsibijietu - u nħallieh jhewden u jhewden sa ma jitfaċċa serp kiefer u jibilgħu bla wisq posati, fradal jew manjieri tal-mejda.

Naħrab mill-kliem sabiħ li nħela minn persuni li kienu f'ħajti fil-passat u li llum sparixxew bla wisq ħabblu sufhom... għax hekk kien hemm bżonn forsi. Naħrab mill-ħsibijiet dwarhom. Naħrab mill-ħabs ta' ħolm din id-dinja u nfittex art taħt stilla bħal f'ta' Betlem - fejn ruħi ssib fejn tkanta "glorja" jew forsi tirgħa ma' erba' mogħożiet umli.

Nixtieq... naħrab mill-leblieba li nħobb, sa ma nsib spazju fejn l-imħabba titfaċċa quddiemi u mhux tibqa' tikolni minn ġewwa. U f'dak il-mument insellmilha, u naħrab b'kemm għandi saħħa fejn qatt aktar ma naraha jew nisma dwarha. Idealment f'post fejn bħall-mibgħeda, l-imħabba mhix kunċett.  Naħrab minn imħabba marida, li trid tħobb biss lilha nfisha. Naħrab minn imħabba li tilgħabha ta' ġest ta' karità... Naħrab minn l'Univers li jobdi lill-imħabba kif jirrakkontaw Battiato u Consoli.

Naħrab, nixtieq naħrab, anki minnek li qed taqra u qed tinterpreta dak li qed taqra skont x'tarrfitlek ħajtek. Għax ħajti qaltli mod ieħor. Għax jien mhux bħall-irġiel l-oħra.

"Mare mare mare voglio annegare
Portami lontano a naufragare
Via via via da queste sponde
Portami lontano sulle onde"

Jien, jien u jien

L-individwaliżmu huwa l-kawża qerrieda ta' tant firdiet u tant solitudni fil-kultura essenzjalment konsumerista tal-Punent. Jien, jien umbagħad jien. Illum nitgħallmu u nippriedkaw kif infendu waħedna, kif nesprimu dak li naħsbu b'assertività u kif inħossuna kapaċi mingħajr wisq bżonn ta' ħaddieħor.

Illum nitgħallmu kif nistħu nammettu li nħobbu bil-għama. Illum nitgħallmu nippuppaw sidirna meta ma niddependu minn ħadd. Illum nitgħallmu ngħoxew fin-narċisiżmu meta nikru post għal rasna. Illum nitgħallmu li aħna b'saħħitna jekk ma nibkux. Illum nitgħallmu li aħjar tiskot milli tafda, li aħjar titmermer milli twarrad ma' ħaddieħor. Illum nitgħallmu nitkellmu dwarna nfusna; il-jien, jien u l-jien.

Jien kburi li nħobb bla wisq raġuni. Li ngħix f'familja u jien parti minn komunità. Illum jien kburi li kapaċi nibki. Kburi li nafda anki meta nweġġa; basta mhux imsikket. Fl-aħħar mill-aħħar, kburi li nħobb, u forsi bħal iblah nibqa', kuljum, nissogra ċ-ċans wisq ħlejju li wara l-iljieli, nerġa' nwarrad.

L-ewwel karozza mberfla

Kienet ilha snin tberren f'rasi. Illum il-ħolma ċkejkna saret realtà. Kulħadd konxju li s-sengħa tat-tberfil qegħda, kulma jmur, tisparixxi u allura xtaqt li jien ukoll ngħin biex dan ma jseħħx. Lura fl-2003 kont tgħallimt napprezza dan ix-xogħol meta ġie f'idi l-album mużikali "Żifna" ta' Etnika. L-idea ta' Andrew Alamango u sħabu, li jintroduċu t-tberfil fl-aspetti mużikali, kienet laqtitni mmens, tant li fl-ewwel esibizzjoni artistika tiegħi fl-2008, kont inkludejt elementi tat-tberfil anki fil-kunest tal-arti viżiva.

Dalgħodu qbadt il-karozza u fid-9am kont San Ġiljan. L-artist Joe Farrugia mill-Qrendi, spjegali kif qagħad jispjega lill-mara li għall-ewwel darba, kien ser iberfel karozza privata. Forsi jien miġnun. Imma kultant sabiħ tkun miġnun. Kellha tkun karozza Beltija, kulur safrani tax-xarabanks l-antiki!

Joe esprima kemm -il darba li ma xtaqtx li juża l-istil l-iktar dekorattiv tat-tberfil għax ħaseb li dan jaf ma jikkumplimentax id-disinn modern tal-karozza, allura, fuq parir tiegħu, għażilna li nkunu ftit kawti u nibdew dan l-esperiment b'interventi sempliċi iżda eleganti. Apprezzajt ħafna l-ħsieb ta' Joe sabiex jgħażel kuluri li jirrispettaw l-isfar oriġinali tal-karozza. Ma nistax ma nsemmix ukoll dik id-'daqqa' partikolari li juża sabiex iberfel linja jew ittra u l-mod kif b'idejh u bis-swaba iżomm il-kontroll tal-linja! Gost kbir tara l-proċess iseħħ quddiem għajnejn. Filfatt ikolli nammetti li l-ħajra li mmidd idejja, tfaċċat...

Inħeġġeġ aktar nies jikkunsidraw din id-dekorazzjoni tradizzjonali fuq il-karozzi personali tagħhom. Għal aktar dettalji, tistgħu tibgħatuli email fuq tascity@gmail.com

Ατέλειωτα Χρυσάνθεμα – Għelieqi bla tmiem ta' kriżantemi. It-titlu ta' kanzunetta Griega li tassew tispirani, http://tinyurl.com/ovzleca - Grazzi lill-artista Maria Pantelidou għall-kitba!

Joe Farrugia spiċċa jberfel bil-Grieg ukoll!

Ejjew tascity!

tberfil... fil-veru sens tal-kelma

Linji perfetti mpenġija bl-idejn - xogħol ta' Joe Farrugia

Remurdered. Maqtul mill-ġdid.

Remurdered. Maqtul mill-ġdid.

Biċċa mużika ideali għall-ġurnata tal-llum fejn ħafna nies madwari narhom mitlufa wara tifkiriet ta' żagħżugħ tal-età preċiża tiegħi li spiċċa msallab wara li ngħata bewsa.

Illum ma tantx għandi ħin nikteb minħabba mpenji oħra, biss kelli dan il-ħsieb iberren hekk kif dalgħodu faqqgħu dawk it-tlett sajjetti meraviljużi bejn is-sur ta' quddiem kamarti u qalbi. U meta jberren, ikun irid jinkiteb!

Lil min qed insallab illum?

'L bogħod minn kull diskors reliġjuż, ikolli ngħid li l-iktar sitwazzjoni li spiss ninjora hija meta nispiċċa nsallab lili nnifsi. Għandi x-xorti li f'ħajti tfaċċaw nies li b'xi lingwa jew oħra, ifakkruni meta jarawni b'xi kaxxa msiemer f'idi u martell fl-oħra. Kultant l-imsiemer tal-biżgħat, l-imsiemer tat-tfulija, taż-żogħżija, l-imsiemer ta' mħabbiet passati, l-imsiemer ta' futur 'bir-ross' bħal f'televiżjoni antik jew l-imsiemer ta' xewqat li jaqtgħuk mill-preżent. Minn issa.

Lil min qed insallab illum?

Nemmen fil-qawmien. Nemmen fi proċess li ħafna jitkellmu dwaru. L-istess proċess imma mhux l-istess nies, jew aħjar, mhux l-istess kostum. Min liebes ta' qassis, min ta' għalliem imżewwaq bl-akkademja, min bil-beġġ tal-mużew, min bid-dreadlocks, min miksi make up, min b'xagħru mqaxxra, min b'kitarra jew pinzell, min f'qiegħ ta' sodda qabel telaq u min f'nofs bikja ta' ferħ. Ħafna kostumi u gwerer iżda l-istess messaġġ.

Nemmen fil-qawmien ta' min weħel mal-passat, ta' dik it-tfajla mill-isbaħ li nqabdet il-Gżira tiġġenera l-flus b'ġisimha, ta' dak l-attivist li spiċċa mjassar mill-ħsieb tal-vjolenza. Nemmen fil-qawmien ta' dak il-missier li ngħalaq f'kamartu jaqra kotba inutli li wikkielu l-kappillan biex mingħalih isalva ruħu billi jixtarr mewtu. Nemmen fuq kollox fil-qawmien tiegħi lejn ħajja profonda bħall-għawma f'baħar blu u r-riħa ġenwina, għalkemm mielħa, tiegħu. Fuq kollox nemmen fil-bewsa; fl-imħabba.

Kien ikun fierah dan it-twemmin, mingħajr il-qawmien.

Le żgħażugħ, mhux kollox hu mitmum. Le ma rridx inkun ħati ta' qtil ieħor.

Remurdered.

Il-bewsa hija qawmien u qatt tradiment.

Kesħa

Ilbes għax tiksaħ
jew tibla xi riħ.
Mhux żmien li tinkixef,
tiġġerra fil-ksieħ.

X'qed tagħmel hawn barra?
Ingħalaq fis-skiet.
Taf sew li dan moħħi,
ma jrid l-ebda nkwiet.

Fuq ġewwa l-kuluri!
X'ħriġt tagħmel fid-dlam?
Int tad-demm u l-laħam,
jew qalb tal-injam?

Biki u theżżiż tas-snien

Ninsab imbikkem u rrabjat fl-istess ħin. Nixtieq nibki u nixtieq inwerżaq. Nitwerwer u nħoss dardir fl-istonku meta nirrealizza li ninsabu ċirkundati b'tant nies imliebsa għamad li lanqas jafu japprezzaw fejn qed jgħixu u x'inhu l-preġju ta' dak li għandhom.

Iktar kmieni dalgħodu xi ħadd tarrafli li wieħed mill-famużi ħwienet fit-Triq il-Lvant ġewwa Belti, dak li fi ċkuniti niftakru armat sa ruħ ommu b'ġarar tal-ħġieġ oħxon u kemmxejn ħadrani, wieħed minn dawk li minjaf kemm attira produtturi ta' films għal din it-triq, illum spiċċa mingħajr il-bieb antik u tant sabiħ tiegħu. Miegħu sparixxiet ukoll il-landa li fuqha kien hemm xi darba l-isem tal-ħanut u li issa spiċċat miksija moffa u sadid. Għaddejt ftit siegħat wara u nilmaħ dan il-bieb fi skipp. Kelli mmur xogħol u ma stajtx nieħu wisq azzjoni bil-mobajl tiegħi, li lanqas kuluri fl-iskrin ma fih. Xi siegħat wara sirt naf li l-iskipp kienet inġabret u allura qabadni niket kbir, speċjalment meta ħabib tiegħi għaddieli ritratt ta' dak li hemm issa, żewġ purtelli tal-ħadid!

B'liema arroganza, xi ħadd għandu dritt iħassar memorja ta' din il-Belt tant għażiża? B'liema livell ta' injoranza (f'sens ta', aljenazzjoni) kapaċi nkunu daqstant birdin quddiem dan it-teżor uniku fid-Dinja? U hawn, l-argument li l-propjetarju għandu dritt jgħamel li jrid f'daru, ma jsegwix. Propjetà fil-Belt Valletta, ċkejkna kemm hi ċkejkna, tgħamel parti minn tessut sħiħ ta' kultura, disinn, ħsieb u lingwaġġ, li vjaġġa tul iż-żminijiet f'ilsien il-ġenerazzjonijiet Maltin, sakemm wasal s'għandna. U llum, f'dinja fejn nistgħu nreġġgħu għal ħajja kull oġġett miblul, naqbdu u nkeffnu kollox biex ngħamlu spazju għal xi lqugħ tal-metall! X'ma jitgħeżżux is-snien!

Għada, (litteralment) jaf ikun imiss lill-ħanut ta' faċċata - tat-tabakk – ħanut tal-1868. Minjaf? Sakemm kulħadd jibqa' sieket, u sakemm id-dipartiment tal-infurzar tal-MEPA jibqa' ma jaħdimx matul tmiem il-ġimgħa, dawn it-tip ta' sfreġji ser jibqgħu isibu l-kumdità kollha. Biss biss minn dan tal-aħħar, ma nafx kemm -il oġġett ta' żminijiet antiki ntrema' fl-aħħar jiem!

Triq San Pawl... qabel u wara t-tkissir 

Il-ġimgħa l-oħra ġara l-istess lil ħanut fi Triq San Pawl u ftit xhur qabel, ix-xorti misset lill-ħanut tat-té ta' Frans fit-taraġ ta' Triq Santa Luċija. B'urġenza kbira hemm bżonn li l-Gvern u l-awtoritajiet interessati, jadottaw sistema, ilbieraħ qabel illum, fejn dawn il-ħwienet, filwaqt li jerġgħu jingħataw il-ħajja, jiġu preservati fil-glorja oriġinali tagħhom.

Jeħtieġ ukoll li l-Beltin u anki l-Maltin li għandhom għal qalbhom il-wirt kulturali, jqumu mir-raqda u jsemmgħu leħinhom. Inutli niċċelebraw titli u festi kulturali jekk fil-qalba tal-mentalità kulturali għandna darsa mħassra li tnemnem daqs xokk elettriku taħt l-ilma.

Tgħid hawn widnejn mhux torox u għajnejn mhux mgħottija?

It-tazza tal-Ġojja

Fl-ewwel kitba tiegħi din is-sena, ktibt dwar Jannar, ix-xahar li tant inħobb. Din id-darba, iżda, għoġbu jkun kattiv u jaħsad il-ħajja ta' wieħed mill-ġirien; Clive Brincat, mgħaruf bħala 'il-Ġojja'.

Mhux ta' b'xejn dak il-laqam meta tara, tisma u taqra l-imħabba li ħalla warajh. Illum fi Knisja ta' San Duminku ppakkjata, ċapċapnilu u bkejnieh imma hekk kif indaqq l-innu tal-Valletta FC, bħal qisni erġajt ilmaħt lil Clive bilqiegħda, hemm quddiem il-Qorti, mhedi jikkonċentra jnaqqax xi disinn fuq dirgħajn xi klijent. Stħajjiltni ħiereġ mid-dar u nsibu quddiem il-bieb u nisimgħu jgħidli "aw Pawl!", b'dik it-tbissima mpekkabbli sinonima miegħu... u forsi naqbdu xi diskursata qasira dwar l-Inter u l-Milan. Illum sellimtlu għall-aħħar darba u tpaxxejt bil-komunità magħquda ta' ħbieb u kollegi li Clive ġab flimkien.

Hekk kif issa kont qed naqra artiklu li jitħadded dwar il-kultura, irrealiżżajt kif karattru bħal Clive, bis-sempliċità kollha tiegħu, iżda b'passjoni lejn kull ħaġa li kien iħobb, rawwem kultura li laħqet u nvolviet ħafna u ħafna u ħafna nies f'ħajtu u issa, anki wara. Bi ftit kliem u ġesti sempliċi dan ir-raġel, li kiber ftit metri 'l bogħod minni, mess lil ħafna u wassal messaġġ ċar. Dan kien l-aħħar kumment tiegħu fuq facebook:

"Bongu , nixtieq lil familja u il hbieb il milied u is sena it tajba mimlija saha u paci u jekk em xahat miggiled jirangaw u jattu il festi it tajba il xulxijn"

Hemm xi żżid? Madre Teresa kienet esprimiet xewqa li tkun qatra f'oċean li tqajjem xi mewġa ħafifa. Mhux b'omeliji tedjanti jew xi akkademja diffiċli imma b'ġesti sempliċi, bi tbissima sinċiera u appuntu b'ġojja lejn kull persuna li tmiss magħna rridu ngħixu din il-ħajja. Hekk, bħal Clive.

Tgħalima f'waqtha. Grazzi Clive - u prosit tas-suċċess li wettaqt minn ħajtek. Tazza li mhu ser tiswied qatt fil-vetrini tal-Beltin! Strieħ fis-sliem ħabib u Forza City dejjem!

Merħba Jannar

Merħba Jannar. Ix-xahar tant maħbub. Ix-xahar li fih tfaċċajt f'din id-dinja u li kull sena jfakkarni li qed nikber. Ix-xahar li kull darba jżewwaqli eċitament kbir bi stennija lejn il-Festa tant għażiża tan-Nawfraġju tal-Appostlu San Pawl f'Malta. Jannar, ix-xahar li fih, għall-aħħar snin, titfaċċa s-sogħba u t-tifkira ta' żewġ irġiel li għalkemm ftit kont naf, ħallewli impatt ħlejju u n-nuqqas tagħhom għaddieni minn żminijiet xejn sbieħ.

Hekk kif ilbieraħ għal ħabta ta' 23:50 intfajt taħt il-friex sabiex nipprova niċċelebra raqda komda flimkien ma' din l-infezzjoni li ġiet tgħix miegħi f'għeluq is-sena, ħsibijieti ttajru lejn dawk l-anzjani Beltin li jgħixu waħedhom. Dak li bil-krozza u b'wiċċ ta' uġiegħ imur jgħamel ix-xirja kuljum u dik li ilbieraħ stess ilmaħtha tiġbed carrier tul it-turġien ta' Triq San Pawl, sabiex tmur lejn il-kwiet u s-solitudni tad-dar.

Dlonk daqqew it-tokki mponenti tal-qanpiena tal-Monument tal-Gwerra u ftit mumenti wara d-daqq, mhux aktar sottili tal-ħornijiet tal-vapuri li kiser is-silenzju fil-Port il-Kbir. Meta l-Belt kienet meqjusa 'mejta', dawn il-mumenti fil-familja kienu speċjali għax kont tilmah iċ-ċelebrazzjonijiet mill-bogħod, fuq xi każin fil-Kottonera jew it-tokki tal-qniepen tul il-kwantità ta' knejjes li jidhru minn hawn. Illum l-għajjat tan-nies kemmxejn xurbana fuq xi sur, il-ħornijiet goffi tal-cruiseliners u l-ħoss tal-murtali kummerċjali, ifakkruni, bħal Jannar, li ż-żmien għadda u n-nostalġija jaf tkun kattiva - imsomma dik ma tafx mod ieħor.

Minjaf ma min fetħu x-xampanja dawk l-anzjani! Minjaf xtaqux jixtru kartuna ħalib dalgħodu imma ma ftakrux li llum kulħadd jibqa' rieqed wara serata mal-ħbieb? U tgħid l-uġiegħ naqsilhom? Tgħid dik l-anzjana għollietha rasha biex tara wiċċ xi qarib li mar iżurha? Jew inħakmet minn aktar solitudni meta fit-toroq ta' madwarha semgħet nies jiċċelebraw dan il-lejl differenti u lilha nesewha bħal dejjem?

L-ewwel jum ta' Jannar. Jum ieħor li jgħaddi u jintesa mal-bqija - jekk mhux aktar - għax lanqas kalendarju għad m'għandi! Merħba Jannar. Din id-darba nlesti t-tlieta u tletin xemgħa u hekk kif neħles minn dan l-uġiegħ, ser inħares 'l quddiem sabiex nerġgħu nkomplu fejn ħallejna bil-ħidma u bl-ideat kreattivi li jiġġeneraw il-ħajja.

L-Internet u l-Melita

Għal darb' oħra, erġajt ħallejt għall-aħħar biex inħallas il-kont ta' madwar €80 għas-servizz tal-Internet mal-Melita. Għaldaqstant, għal darb'oħra, qomt mingħajr is-servizz għax il-Melita b'eleganza liema bħalha u mingħajr pre-avviż hekk jitrattaw ma' klijenti li ilhom sa mill-bidu tal-elfejnijiet jużaw u jħallsu għas-servizzi tagħhom.

Pruvajt nidħol fis-sit elettroniku tagħhom - taf int - timmaġina li ser jgħatuk aċċess biex għallinqas tħallashom u tkun tista' titlob is-servizz lura. Imma le. L-ebda aċċess.

Imsomma, ċempiltilhom mill-mobile u bħal dejjem bdiet il-litanija ta' messaġġi rrekordjati li ma jgħinu xejn f'mumenti ta' frustrazzjoni. Messaġġi bil-Malti segwiti minn interpretazzjoni bl-Ingliż li jtertqulek qalbek iktar minn maġistrat kiefer li jdum idur mal-lewża biex jaqtahielek għall-forka!

- Messaġġ ta' Merħba (Malti u Ingliż)
- Stedina biex tgħażel bejn 1 u 2 skond il-lingwa li tippreferi.
- Hawn tiġi mgħarraf li t-telefonata jaf tkun irrekordjata
- Tintgħalab iddaħħal in-numru tal-kont tiegħek magħhom
- U hawn tingħata dettalji dwar l-istat tal-kont tiegħek
- Issa jmiss jinfurmawk li tinsab f'menu prinċipali fejn tingħata 5 għażliet…
- U minn hemm, wara grazzi, tgħaddi għal menu ta' 4 għażliet oħra
- Eventwalment hawn tiġi mgħarraf li ser tiġi trasferit ma' rappreżentant tal-'Customer Care'

Il-beżżul fija jispikka f'dawn il-mumenti. Spiċċali l-kreditu f'nofs telefonata u ara ma taħsibx li ċempluli lura! Le, erġajt ċempilt minn mobile ieħor fil-familja. Martirju ieħor, għalkem din id-darba għafast in-numri mingħajr ma kelli nisma kollox.

Għall-erwieħ! X'għall-erwieħ! Staqsejt nistax ngħati l-informazzjoni tal-kard tal-kreditu biex inħallas il-kont iżda qaluli li rrid immur f'uffiċċju minn tagħhom għax m'għadhomx jaċċettaw pagamenti mit-telefonati. Qaluli li nista' nħallas minn fuq my.melita.com ukoll… bħal donnhom insew għaliex qed inċempel!

Għal grazzja t'Alla skoprejt li mill-kamra l-baxxa nista' naqbad bis-serqa ma' network ta' uffiċċju fil-viċin, u allura min hawn u minn hemm irranġajt is-sitwazzjoni. Imma x'kedda!

Viva Malta

Kif rajna dan l-aħħar f'għadd ta' gazzetti, il-Prim Ministru Joseph Muscat wasal jikkunsidra li juża kull mezz sabiex jiġbed l-attenzjoni tal-Unjoni Ewropea rigward l-effetti tal-immigrazzjoni llegali mill-Afrika ta' fuq, lejn Malta. Nemmen li kontra l-prinċipji umani tiegħu, wasal jikkunsidra, jew iħalli lok ta' konsiderazzjoni tal-ormaj famuża "push back policy".

Kif stqarrejt pubblikament fuq Facebook u anki permezz tal-firma tal-petizzjoni li għamilna numru ta' prattikanti tal-arti u d-disinn f'Malta, ma naqbel bl-ebda mod li dawn in-nies jintbgħatu lura mingħajr ċans li japplikaw għad-dritt tar-refuġju. Il-push back ma hija xejn ħlief biżà indefinita u nkontrollabbli li ssikket lill-qalb milli tagħraf issostni lill-bnedmin ħutna f'mument ta' kriżi. Huwa ironiku kif meta ssir xi ġabra mill-kaxxa maġika tat-televiżjoni, ninfexxu nitħassru lil nies varji u neżaltaw ruħna f'offerti ta' flus eżorbitanti. Imma ara jersqu lejn ix-xtut imqaddsa tagħna għax niklulhom wiċċhom bit-tgħajjir!

Sfortunatament kien hemm artisti li baqgħu lura milli jingħaqdu mal-bqija kontra din l-possibiltà. Wara li qrajt dak li stqarr Kenneth Zammit Tabona fuq il-Facebook tiegħu jidher li l-valutazzjonijiet tal-petizzjoni setgħu ma kienux mixtarra sew. Zammit Tabona kiteb: "I never wrote that I advocate push backs but that I resent people acting as if they had happened; especially because when they did happen nobody badgered me for my signature on any petition as what happened now. I find it farcical that I am protesting about something which is old hat because once the Court of Human Rights has vetoed it the PM complied immediately."

Huwa minnu li f'dan il-każ, il-push backs ma seħħewx - biss ir-rikatt sar u sar bil-qawwa. Iva kien rikatt indirizzat lejn l-Unjoni Ewropea (dik l-istess Unjoni li ħafna tant tqabdu għaliha fl-2004), imma rikatt li uża lil dawn il-persuni f'mumenti ta' kriżi. U dan ma naqblux miegħu ukoll. Filfatt il-petizzjoni kienet tindirizza mhux biss il-push backs iżda wkoll kull kunsiderazzjoni tagħhom, tiġi meta tiġi: "We join in expressing our firm disapproval of considering similar policies that would place the migrants’ life at risk."

Lura fl-2002 meta saru l-famużi push backs lejn l-Eritrea, jien kelli tnejn u għoxrin sena u kont impenjat fuq livell soċjali iktar lokali u personaliżżat. L-inqas idea dwar iċ-ċrieki artistiċi, l-immigrazzjoni u l-petizzjonijiet. Biss, illum, nemmen li żball antik ma għandux jikkundannani biex nagħmel ieħor, u appuntu għalhekk, orġaniżżajt il-petizzjoni. Il-push backs fihom infushom huma ġesti kodardi, ġejjin minn fejn ġejjin u jsiru meta jsiru. Minflok nistaqsu għalfejn fl-2002 ħadd ma kellu l-bajd sabiex jgħamel ftit oppożizzjoni, ingergru għax illum saret! Ma nafx! Nitfixkel!

U għal dawk kollha li talbu lil kull min iffirma xi petizzjoni sabiex iżomm f'daru xi immigrant jew tnejn, tajjeb li jkunu jafu li l-argument tal-petizzjonijiet ma huwiex li Malta ssir xi tip ta' lukanda fil-Mediterran iżda li Malta, li hija dari, tkun il-post ta' refuġju u komfort, temporanju, għal ħutna f'mument ta' disperazzjoni. Konvint li l-awtoritajiet, bis-sistemi llum esperti tagħhom, jafu jgħarfu l-każijiet ġenwini minn dawk inqas ġenwini, u jieħdu proċeduri skond il-kuntest.

Le - Malta ma tistax titlef il-valur tal-imħabba li dejjem sawwarha. Il-push backs, jew, nerġa ngħid, kull kunsiderazzjoni tagħhom, hija kważi kważi att kriminali. Huwa importanti li kulħadd jifhem li ħadd ma hu kontra li l-Unjoni Ewropea tikkollabora f'din is-sitwazzjoni, biss hemm mod u mod kif tasal għal dak il-proċess. Ta' min ninnutaw kif, per eżempju, il-problema tal-immigrazzjoni ingħatat iktar attenzjoni mill-media internazzjonali permezz tar-ritratt, kapulavur artistiku ta' Darrin Zammit Lupi milli bl-idea tal-push back policy li ażżardajna nikkunsidraw! Reuters, Telegraph, New York Times u BBC fost oħrajn, kienu minn ta' quddiem li tkellmu madwar dan ir-ritratt. Il-qawwa tal-arti li bħal fil-każ tal-Guernica, tikxef l-inġustizzja, bla ma taqa' fil-baxx!

J'Alla nikbru ma ndumux!

Wara l-Isle of MTV

Kont ser nibgħat din l-ittra lil xi gazzetta lokali imma reġa' bdieli għax niddejjaq nistenna, u ddeċidejt li għalkemm bil-lingwa Ingliża, insemma leħni fuq din is-sitwazzjoni li ltqajt magħha llejla wara l-kunċert tal-Isle of MTV.

02:00am Sometime in 2012.
I have just driven past amber at the first set of pelican lights in a deserted St Anne's Street Floriana only to get halted near the APS branch by a group of police who issued a fine for driving past "the red lights". Given no chance to argue, I had to write one or two letters to concerned departments so that the fine got dismissed a few months later.

01:00am Tonight.
I have just been lucky enough to drive back home into Valletta through Floriana following a night out at the movies. It took me forty minutes to complete the hefty journey… just imagine a fictitious paramedic trying to reach out to an incident scene at lower Valletta. Forget it! During this time I had the chance to listen to the new album of Italian band “Ministri” and ironically also witness the collapse of street laws in front of the eyes of Police. Isle of MTV had just finished and it was a free for all situation. Leading the deliberate bad practice were Arriva busses who, rather than driving within their dedicated bus lanes they took in the middle lane and one after the other ignored a driver, probably a Floriana resident, who indicated an attempt to turn left to Sarria area. One specific ‘sardines’ car which I happened to be following, was home to, let’s say, six guys. Each time their engine was turning off because of the overweight, they smiled at the nearest drivers and police like all is well and good. Drivers opting last second for a ninety-degrees turn into one road they were otherwise missing, were patrolled calmly and given no warnings. Police also missed out on the tens of people sitting, standing and eating on the Vilhena lion fountain much to the enjoyment of the Local Council's budgets i would guess!

And what about the tonnes of food and drink containers littered all over St Anne and adjacent streets? What about large groups of foreign students taking memorial pictures in the middle of St Anne Street to the detriment of traffic flow and their own safety? Also, is it ok for people to walk partly naked at 1am in Floriana, or to drive with their passenger sitting on the side window? And parking on pedestrian sidewalks and on double yellow lines? I don’t know! I’m probably missing out on various other misconducts tonight but I’m pretty tired now and I think you’ve got the gist.

Don’t get me wrong. This is not a complaint about the event, to which I’m all in favour. This is criticism towards the Police and the authorities above them, obliging to such blatant irregularities. The law is there and should indeed be respected anytime, yet, it should also be given its due respect by Police officers anytime as well. How could we, as a society, nurture an educated culture, when the authorities themselves disregard flagrant misconducts? Why would we need law that caters for public order and welfare, if this does not achieve its practical goals during mass events? Wouldn’t the authorities be ridiculing the law and its direct beneficiaries if they access it only when it’s a three to one or ten to one demonstration of power?