Illejla saret l-inawgurazzjoni ta' terz tal-proġett ta' rinovazzjoni tal-Public Broadcasting Services (PBS). Illum, propju l-aħħar Ġimgħa 'libera', qabel dik diġà mpenjata bid-dibattitu bejn Simon Busuttil u Louis Grech. Sabiħ tara l-PBS jieħu din l-ispinta 'l quddiem imma ċertu "kumbinazzjonijiet" xorta jibqgħu iħassbuni bla ma nixtieq. Ħa nirreferi għal tlieta biss:
Fi żmien sitt xhur il-PBS filli kien "qed jaqa'", filli ġie "qisu CNN". Dan fi kliem xi persunaġġi li ġew intervistati. Interessanti din l-għaġla.
Il-kumbinazzjoni tal-inawgurazzjoni illum, il-Ġimgħa - kumbinazzjoni minuti qabel jibda Xarabank tal-WE. B'hekk Xarabank jibqa' jissemma bħala "l-ewwel programm taħt is-sistema l-ġdida" Minflok PBS xandar programm speċjali dwar l-inawgurazzjoni, intuża programm privat bħala pjattaforma. Kif ser jitqasam d-dħul tar-reklamar illejla bejn l-istruttura tal-privat u dik pubblika?
Ir-referenzi sottili lejn il-proġetti mwettqa taħt Gvernijiet Nazzjonalisti kkumparat mas-satira waqt "TV Hemm" dwar il-Partit Laburista hija kurjuża u fl-istess ħin tfakkarni fil-partiġġjaniżmu nvadenti u agressiv.
Il-propaganda partiġġjana tinħass iktar qawwija fi kliem il-Prim Ministru meta qal:
“... the Government’s vision in broadcasting has
always been and still will be that to be proactive and innovative. The change in Maltese broadcasting dates back to the early 90′s”
reiterated Dr Gonzi, when PBS was established to replace Xandir Malta. We brought a revolution in broadcasting when at that time we only
had two radio stations and now we have thirteen who broadcast on the FM
with several other broadcasting on the digital platform that add up to
the several community radios”
Nistaqsi... xi tfisser eżatt dik il-"we" u kif tintuża fit-tielet paragrafu? Aħjar nidħak! Jekk ir-referenza lejn il-PN hija minnha, allura vera qed immissu l-qiegħ meta f'okkażjoni, suppost prestiġġjuża ngħamlu propaganda partiġġjana.
Fl-aħħarnett, din il-moda li nawguraw fażijiet ta' proġetti u mhux il-proġett komplut, hija tassew mera tas-sitwazzjoni redikola ta' kif qed jitmexxu l-proġetti issa li l-elezzjoni qorbot. Fażijiet mill-proġett ta' Piano, fażijiet mill PBS, fażijiet, fażijiet.
Filwaqt li nifraħ quddiem dan it-tip ta' żvilupp fl-oqsma tal-midja, nittama li l-ewwel u qabel kollox tiġi rrinovata l-attitudni li tħallat il-politika partiġġjana anki ma' dawn it-tip ta' investimenti u ma' dawn l-istrutturi.
Id-dinja ma spiċċatx. Basktijiet, bozoz, ġugarelli. Uċuh mehdija fit-tlellix jew forsi fil-bambin tax-xemgħa. Orsijiet griżi jgħannqu t-tfal, rġiel xwejjħa libsin l-aħmar jiddendlu mal-gallariji, platti imdellka biz-zalza tal-fenek li issa kważi tinxtamm qarsa, rombli tal-karta iġenika u stonku għajjien.
Il-Milied. Żmien l-awguri. Dâri f'kartolina u iktar riċenti, b'sms. Illum jidher li facebook rebaħ din il-battalja wkoll. Awguri jinstabtu ma' kull ħajt f'dan is-sît soċjali.
Il-Milied. Twelid ta' tifel rivoluzzjonarju, għal ħafna rrelevanti; miksi taħt plastik u kartun minn tal-kaxxi mormijin, presepji f'vetrina, spallieri tal-firdiferru, ponsiettas nixfin, karti ċkejkna tal-fidda bi ħsibijiet fuqhom, remettar aċiduż u tqil, tazzi tal-ħġieġ, tappijiet tas-sufra u kontraċettivi użati. Maġenb il-muntanja b'riħa ta' qrusa; il-bniedem mitluf minn sensieh, rieqed, għoddu mejjet. Forsi għada jiftakar xi ħaġa x'ħin jistenbaħ.
Ejja twieled hawn ja tfajjel ċkejken. F'kamra mbarazz u moħħ mhux wisq inqas. Imma tiddejjaqx twettaq ir-rivoluzzjoni.
Din hija ittra ta' viżjoni li jiena kont bgħatt f'email, nhar it-23 ta' Frar 2010 lill-membri kollha ta' ĊAMYouths, ftit siegħat qabel ma ttieħed il-vot għall-leadership committee preżenti.
Għażiż ħabib/a,
Introduzzjoni
Kif taf, ġejt innominat
bħala wieħed mill-kandidati bħala wieħed mill-erba’ mexxejja ta’
ĊAMYouths. Huwa ta’ unur għalija li ġejt ikkunsidrat al altezza ta’ dan
l-inkarigu u f’dan il-mument meta aħna l-membri qed niġu mitluba ngħamlu
għażla, nħoss li għandi naqsam miegħek dawn il-ħsibijiet; mhux biex
nirbaħ posti, anzi, biex ngħamel ċari l-ideali tiegħi lejn ĊAMYouths u
fejn nixtieq li kull eventwali mexxejja għandhom jiffukaw il-ħidma
tagħhom. Nahseb li xieraq ukoll li kulhadd ikun jaf xi ħsibijiet għandi
qabel jgħamel l-għazliet tiegħu.
Ma naħsibx li hemm bżonn inkun wieħed mill-mexxejja biex inkun nista
nwassal dak li nemmen fih, għax nemmen li l-mexxejja qegħdin hemm biex
iwettqu r-rieda tal-membri. Konvint li dan ir-rwol huwa mpenn iebes u
mhux passatemp. F’dan il-mument inħoss li xieraq naqsam miegħek, minn qabel,
dak li jien nemmen fih.
ĊAMYouths hija għaqda ta’ żgħażagħ fi ħdan is-Soċjetà Missjunarja
ta’ San Pawl. Għaqda li tul l-ewwel 15 -il sena tagħha għarfet tibni
lilha nfisha fuq tlett valuri; komunità, spiritwalità u missjoni. Illum
li l-għaqda kibret ġmielha, tajjeb li naraw daqsxejn fejn nixtiequ
naslu, nifhmu aħjar u nkebbsu l-ħeġġa lejn it-twemmin li ħallielna
Monsinjur De Piro f’isem l-Appostlu Missierna San Pawl kif ukoll inkunu
xhiedha ta’ dan kollu.
Imħeġġeġ mill-valuri li ħarġu fl-attività tal-komunitajiet il-kbar,
FUSION, nixtieq inwassal it-twemmin tiegħi li f’din l-opportunità kbira
li għandna li ngħixu ħajja komunitarja, kull membru għandu "Jisma, Jara u
Jxandar". Kull membru għandu possibiltà jirċievi u possibiltà jgħati.
Fi triqtu lejn Damasku, Sawlu, ir raġel ta’ ras iebsa li ħolom biss
f’li jeqred it-twemmin ġdid li ħawwel Kristu, irċieva sejħa. Sejħa
kuntradittorja li sabbtitu mal-art, mhux sejħa faċli, imma sejħa li
biddlitu hekk kif laqagħha. F’Sawlu ma nbidilx il-karattru imma nbidel
l-iskop ta’ ħajtu. M’ilux smajt li f’dak il-mument Sawlu ma baqax
il-protagonist ta’ ħajtu imma sar Alla l-protagonist.
L-iskop ta’ ĊAMYouths
Il-kelma skop illum saret tberren
f’rasi ta’ spiss. Nemmen f’viżjoni fejn ĊAMYouths ma tibqax sempliċement
għaqda taż-żagħżagħ, bħalma hawn ħafna, iżda tkun leħen fis-soċjetà;
leħen li jitkellem favur inklużjoni u rispett u leħen li b’kuraġġ,
responsabiltà u maturità, jikkundanna l-inġustizzji u diskriminazzjoni.
Dan jista' jsir b’ħafna modi fosthom l-użu tal-medja.
ĊAMYouths għandha tgħamel dan bil-kliem kif ukoll bl-eżempju.
Għandna niftħu l-bibien beraħ għad-diskusjjoni dwar suġġetti
skomdi/antipatki u ma nibżgħux minn ħsibijiet ġodda, forsi
rivoluzzjonarji u li jmorru kontra l-kurrent tal-mument. Suġġetti li
nemmen li għadhom jingħataw prijorità huma, fost oħrajn, il-kumdità jew
nuqqas tagħha, li jsibu membri f’ĊAMYOUTHS li mhux bilfors iħossuhom
qrib tat-twemmin kattoliku jew nisrani; il-kumdità, jew nuqqas tagħha,
li jista jħoss persuna omosesswali f’komunitajiet tagħna u fil-familja
MSSP; il-faċilitajiet għall-persuni b’diżabilità eċċ.
Viżjoni
Nixtieq li naħdmu lejn viżjoni fejn ĊAMYouths
joħlom, iwelled u jrawwem libertà ta’ espressjoni, ideat u nnovazzjoni.
Viżjoni fejn jiġu sostnuti inizzjattivi fi ħdan it-tlett prinċipji ta’
ĊAMYouths. Fejn kull membru jiġi mħeġġeġ joħlom u jikkrea billi jingħata
ispirazzjoni, widen, direzzjoni u sapport. Viżjoni fejn l-ixjeħ membru u
l-iżgħar jingħaqdu sabiex iwettqu s-sejħa Pawlina.
Inħoss li wara l-ħidma sfieqa tal-kumitat preżenti, ĊAMYouths għandu
joqrob dejjem aktar lejn is-Soċjetà Missjunarja ta’ San Pawl sabiex
tkompli tikber relazzjoni b’saħħitha. Relazzjoni fejn iż-żewġ naħat
jisimgħu lil xulxin, b’fiduċja reċiproka, u jikbru flimkien. Nemmen li
ż-żewġ naħat għandhom ħafna x’joffru lil xulxin.
L-iskop ta’ dak li nwettqu
Filwaqt li nkomplu nrawwmu u
ndakkru l-kariżma missjunarja tas-Soċjetà Missunarja ta’ San Pawl, jiena
nemmen li jkun xieraq jekk f’mumenti, nieqfu u naħsbu dwar l-iskop,
mhux biss tal-għaqda, iżda wkoll ta’ dak li jsir fl-għaqda.
Nemmen li tajjeb nieqfu sabiex nixtarru dwar fejn sejrin il-proġetti
ta’ missjoni tagħna. Kif dawn qed jitwasslu għand il-membri ta’
ĊAMYouths, kif qed ‘jinbiegħu’ għand nies li m’humiex parti minn
ĊAMYouths. Nistaqsu dwar il-kapaċità, jew in-nuqqas tagħha, li
ĊAMYouths
tkompli tifrex u jew iżżid fil-missjonijiet tagħha. Dan jista jsir anki
jekk inħarsu lejn it-timeline tas-Soċjetà Missjunarja ta’ San Pawl li
ġie preżentat lilna waqt FUSION.
Nissuġġerixxi wkoll reviżjoni ta' ċertu strutturi u sistemi sabiex dawn dejjem jgħatu leħen lill-membri.
Bilanċ
Għalkemm
nemmen bi sħiħ bil-valur tal-komunitajiet u għalkemm nemmen li
ĊAMYouths għandha tkun opportunità sabiex aktar persuni jkollhom din
il-grazzja tal-għixien f’komunità, dejjem ħassejt li hemm bżonn li
jistab bilanċ bejn it-twaqqif ta’ komunitajiet ġodda u t-trawwim u
taħriġ ta’ persuni li jistgħu jaqdu bi sħiħ ir-rwol ta’ gwida għal
komunità. Dan ir-rwol iġib miegħu responsabbiltà kbira u jitlob
dedikazzjoni kontinwa u għerf minn naħa ta’ kull min jidħol għalih.
Jitlob ukoll ammont ta’ attenzjoni minn naħa tal-Kumitat tat-Tmexxija.
Relazzjonijiet Esterni
Nixtieq insemmi wkoll l-aspett ta’
relazzjoni ma’ għaqdiet u organiżżazzjonijiet ‘l barra minn ĊAMYouths.
Filwaqt li nifrah lill-kumitat attwali għall-bibien li fetħu, speċjalment
fuq xenarju ewropew, nixtieq li nimbotta l-idea li s-sabiħ li qed
ngħixu f’aspetti varji f’ĊAMYouths, insibu ħin naqsmuh f’diskussjonijiet
u laqgħat anki ma għaqdiet lokali oħrajn speċjalment dawk li jħaddnu
kariżmi Pawlini.
Fejn jidħol l-isem tal-għaqda, għalkemm nammetti li jiena wieħed
minn dawk li qatt ma ħassejt bżonn ta’ bidla, nemmen li tajjeb jekk
jitkompla x-xogħol siewi li sar s’issa f’dan il-proċess.
Issa li
huwa konfermat il-bini ta’ ċentru ġdid fir-Rabat, ikun tajjeb jekk dan
jiġi armat kemm sabiex jaqdi lil komunitajiet f’ĊAMYouths kif ukoll
possibilment sabiex irendi bħala dħul finanzjarju minn kiri ta’
faċilitajiet.
Spiritwalità
Nemmen li wasal iż-żmien fejn ĊAMYouths terġa
tgħafas fuq l-aspett spiritwali tal-ħajja komunitarja. L-ispiritwalità
tirrikkjedi ħsieb u profondità fuq livell personali iżda ġġib magħha
ċ-ċans li nesperjenzaw il-fiduċja fil-komunità u l-fiduċja fil-Mulej.
Sabiħ li flimkien noħolqu ċ-ċans li niskopru dawn it-tlett livelli ta’
spiritwalità.
Responsabbiltà
Nixtieq li min jieħu dan l-inkarigu u
nkarigi oħra f’ĊAMYouths jidħol għalihom b’maturità u b’entużjażmu.
Tajjeb jekk anki persuni f’dawn ir-rwoli jgħarfu meta jonqos
l-entużjażmu u jekk ikun hemm bżonn jgħarfu jgħamlu pass lura. Nixtieq
sa fl-aħħar li, ikun min ikun fil-pożizzjoni tant iebsa ta’ mexxej ta’
ĊAMYouths ikun bniedem li apparti li jħaddan il-valuri li għaddielna San
Pawl permezz ta’ Monsinjur Ġuzeppi de Piro, jispira lil ħaddieħor
sabiex jiskopri s-sbuħija ta’ dawn l-istess valuri.
"Għax din kwistjoni t'opinjoni" jgħid ir-ritornell tal-Brikkuni fil-kanzunetta Kollox Suġġettiv. Tassew, kulħadd impestat bit-talenti, kulħadd jaħseb li jista' jiddeċifra l-ifjen kombinazzjoni matematika permezz tal-opinjoni jew tal-gosti.
Wara li kkritikajt id-disinn fqir immens tal-famuż riklam għad-Dinner Dance Buffet ta' Dr Stefan Buontempo bil-kelma "orribli", kont qed nistenna, kważi bi ħġari, li xi 'opinjonista' ieħor jitfaċċa. Fl-aħħar, daqs sagħtejn ilu, il-ġenju tal-lampa qatgħali xewqti:
"m'għandekx
dritt tmaqdar il-mod kif għamilt għax forsi lil Dr Buontempo hekk
jogħġbu. Naħseb kien ikun ferm aħjar li kieku ktibt e-mail lil Dr
Buontempo biex jekk għandek xi suggerimenti ressaqhomlu!! Jekk taf lil
Dr Buontempo, iddedika ħajtu għall-politika u jekk trid tkun voluntier
ma naħsibx li mhux se jilqgħek b'idejh miftuħa." – K.Caruana
Każ tipiku fejn il-Malti jippreferi jirrikorri għall-element ta' gosti/opinjoni u mhux għal valur tekniku ta' prodott. Valur tekniku li, iva, fid-disinn jeżisti wkoll, u mhux opinjoni.
Affaxxinanti l-kunċett ta' "voluntier" li spiss jitqajjem f'kuntesti fejn tmiss l-espressjoni artistika. Tal-madum, il-perit, tabib, nutar, għalliem, ġurnalist, parrukkier, dentist... dawk professjonisti u allura tifhem li jġibu prezz magħhom. Mhux disinjatur imma. Dak voluntier, daqs il-President fil-Perù!
F'dan il-każ, il-parlamentari jgawdi saħansitra minn konnotazzjonijiet Bibbliċi: "iddedika ħajtu għall-politika" - kawża ta' ġieħ; filwaqt li jien, biċċa disinjatur (ironikament bħal king Franco, dak il-"biċċa deputat"), jien mitlub inkun voluntier għax ma ddedikajtx ħajti għal xi skop qaddis.
F'pajjiż fejn tirrenja, apatija jew aħjar, baħħ kulturali
post-modern u kontemporanju, il-poplu qatt ma ġie mgħallem ifarrak dak l-ikel li dejjem
kiel mill-imgħarfa tal-fsied familjari u jikkrea riċetti ġodda.
Il-Malti, fil-maġġoranza tiegħu għadu jbeżlaq lejn statwa figurattiva
f'nofs pjazza u pittura ta' għasfur tal-bejt. Jiġuni
f'moħħi varji episodji: gażżetta lokali talbet lil disinjatur ħabib
tiegħi sabiex "iħassar" ġummiema (għadni kif skoprejt li hija l-kelma Maltija għal nipple) minn fuq reklam ta' ditta barranija li
kienet turi tfajla fl-ilbies intimu. U kemm tqalleb Eugène Delacroix
meta disinjatur kollega tiegħi ġie mitlub jgħatti sider il-Libertà
fil-pittura La liberté guidant le peuple minħabba li kienet ser tidher fi ktejjeb edukattiv għat-tfal!
Il-Malti f'kull
aspett, jibża' mill-iskumdità li mistoqsija taf iġġib magħha u appuntu
għalhekk, ħuwha; l-għerf, rari jersaq sa xtutna. Filwaqt li jberraq u jiskanta quddiem il-għerf kreattiv tal-barrani, il-Malti jmeċlaq bħal mogħża, fl-opinjoni u l-gosti!
Dal-pajjiż ilu jgawdi minn Awtorità tax-Xandir sa mill-1961. B'mandat li tkun ta' tarka fuq l-informazzjoni li tixxandar fil-midja lokali, hija tissalvagwardja l-verità fil-kontenut u fl-obbligi kummercjali u amministrattivi.
Nixtieq illum inqajjem punt dwar kemm l-awtorità hi ddedikata u mħarrġa sabiex anki tissalvagwardja eventwali manipulazzjoni ta' messaġġi. Għalfejn qed ngħid dan?
Qegħdin f'kampanja elettorali mhux uffiċċjaliżżata u bħalma nħobb ngħamel dejjem, nipprova nsegwi l-aħbarijiet taż-żewġ partiti politiċi. Huwa minnu li meta tara l-aħbarijiet mgħaġuna minn oppożizzjoni, tħoss li l-aħħar tad-dinja huwa diġa' magħna kif huwa minnu wkoll li meta tisma l-aħbarijiet skont il-Partit fil-Gvern, tħoss li t-tieni miġja ta' Kristu taf tkun kemmxejn inutli fl-istat idilliku li ngħixu fih. Storja antika, li nifhem ukoll. Dan qisek qed tara l-Milan Channel u l-Inter Channel qabel d-derby tal-Madonnina!
Li jdejjaqni huwa meta b'mod sfaċcat u makakk - anzi, jkolli ngħid, b'ammont ta' ħażen - il-gruppi editorjali tal-Partiti, jitolbu lill-persuni tekniċi u kreattivi tagħhom sabiex jeditjaw filmati bi skop li dawn jiġu jinfthemu b'mod differenti. M'huwiex dan manipulazzjoni tax-xandir? Ma huwiex dan fid-dover tal-Awtorità li tikkoreġih? Ġurnalisti, edituri, fotografi u grafiċi professjonali qatt ma tgħallmu r-regola li fil-ġurnaliżmu, l-ewwel dover hu li tgħid il-verità?
Il-problema tkompli tiggrava meta tinduna li anki nies ta' ċertu kalibru u ntelliġenza, qed jaqgħu għal din il-manipulazzjoni - aħseb u ara l-poplu fit-triq! Bħalissa qam id-dibattitu dwar il-famuża paga minima. U hawn ġara bużillis kbir li tani mbuttatura sabiex nikteb din in-nota! Filwaqt li Joseph Muscat qal proposta minn tiegħu, li sinċerament ma nistax nikkummenta fuqha għax minix ekonomista, il-midja tal-Partit Nazzjonalista, għażlet li teditja l-filmati b'tali mod li 1) tibdel il-ġist tal-kontenut 2) tixħet dawl qarrieqi fuq il-proposta 3) tgħati mpressjoni li min attenda għad-dibattitu ukoll kien qed jibilgħu f'għajnu b'dak li kien qed jintqal. Bqajt imbellah nara l-verżjoni tagħhom! Biss, kull bniedem responsabbli u ta' ftit idea dwar editing, jaf biżżejjed kif sar il-cutting tal-immaġini, u tal-audio, l-għażla tal-mużika u t-ton tal-vuċi! Hemm għalfejn nispjega dak ukoll?
Hawn hu x'qal Joseph Muscat. Ara l-vidjo.
Hawn hu kif xandarha l-Partit Nazzjonalista. Ara l-vidjo.
Kif żewwaqha aktar l-Partit Nazzjonalista. Ara l-vidjo.
Manipulazzjoni oħra hija l-użu tal-kelma "deċiżjoni/wegħda (ta' Muscat li jiffriża l-pagi)", minflok "proposta". Ninża l-kappell lill-istrateġisti tal-PN imma nitqażżeż ninnota l-ammont ta' makakkerija qarrieqa li tintuża f'kuntest tant importanti għal poplu.
Dħalt facebook u sibt li anki Michael Briguglio (Chairperson and spokesperson for Economic Policy and Culture of Alternattiva Demokratika) qed jiġi nfluwenzat billi jgħid "It baffles me how a new middle class can be built whilst denying workers an increase in the minimum wage."
Minjaf fejn hi l-Awtorità tax-xandir? Ftit editing jaf jibdel l-ġist ta' diskursata imma naħseb lanqas riefnu qawwi ma jibdel il-klikkek partiġġjani ħomor u blu li jeżistu nfilsati kullimkien! Filwaqt li f'Madrid il-poplu niżel jieħu sodisfazzjon fuq id-drittijiet tiegħu, hawn Malta l-poplu mar iċapċap lil min qed iwaħħalulu ħelu ħelu, kuljum u jbellgħalu nformazzjoni manipulata! Ħasra li anki l-PN qed ikompli jaqa'
għar-redikolu meta jippromwovi din l-attitudni fil u mill-midja tiegħu. Jien quddiem dan kollu ma nista' ngħamel xejn ħlief nikkummenta, ngħati raġun lil Franco Debono u nsaħħaħ l-għażliet tiegħi lejn elezzjoni oħra!
Kif ngħamel ta' spiss, dħalt naqra l-blog tal-'king' Franco Debono, li bħalma stqarrejt kemm -il darba, għandi ammirazzjoni kbira lejh. Qrajt il-kitba tiegħu tas-26 ta' Settembru, dwar l-idea tat-tielet partit politiku u minħabba li ili snin neqred b'din l-idea, ma stajtx ma nirriflettix ftit fuq dak li kiteb.
Nikkwota parti minn email li ktibt fit-2 ta' Settembru,
Ili snin ngerger
li s-sistema dualista tal-parlament u l-politika ngenerali Maltija hija
bażwija. Ittamajt fl-AD izda ghalxejn. Iva nemmen li t-3 partit huwa
bzonnjuż immens. Hemm bżonn titwaqqaf il mentalità fejn il-partiti
jfittxu ftit 'yes sirs' u jrawwmuhom bħala kandidati fidili li jgħidu
iva għal kollox!
Għandi opinjonijiet varji rigward l-idea. Nemmen f'kandidati ndipendenti eletti fil-Parlament u f'aktar għaqdiet rappreżentattivi. Noħlom ukoll li partit ġdid ikun iddistakkat kompletament mill partiti preżenti kemm bħala mmaġini, kif ukoll bħala isem. Wisq nibża' li b'titlu li jinkorpora fih il-kliem "Partit" u "Nazzjonalista", dan jaf jiġi nterpretat bħala klikka ġdida b'fundamenti simili għal tal-Partit Nazzjonalista u allura jgerrex lil kull min maż-żmien, tgerrex mill-bejta l-blu u lil min, frott l-injoranza, dejjem ra l-blu bħala kulur l-għadu.
Nemmen f'għaqda jew assoċċazzjoni li ssemma' leħinha fuq dak kollu li jkun qed jiġri u mhux biss dwar dak li jinteressa lilha biss. Hawn fejn inħoss li tfalli l-Alternattiva Demokratika. Nemmen f'għaqda u mhux f'Partit li jitolbok tħallas membership u li jħeġġek tinżel tpaqpaq meta jiskorja! Il-politika mhix partita futbol! Nemmen f'Madrid fejn il-poplu jirreaġixxi kontra min imexxih ħażin u mhux jibqa' passiv. U hawn nħeġġek tara dan l-intervent ta' Maurizio Crozza li jitkellem madwar l-istess punt.
Nittama li int li qed taqra, tgħaraf ma tibżax tinħall mill-irbit ta' kultura li rawwmitna ngħażlu bejn aħmar u blu; inġelldu l-aħmar u l-blu; nikkategoriżżaw f'aħmar u blu; nirraġunaw f'aħmar u blu! Xi wħud jgħiduli "imma dan kollu ħolm Pawl! Trid tkun prattiku!" Jien ngħid... kieku ħadd qatt ma' ħolom, kieku għadna niġġerrew Għar Dalam!
Nittama li l-lirika tal-grupp Sempliċiment tat-Triq isseħħ tassew: "Ħabib, ir-revoluzzjoni qegħda fil-qrib"(mill-kanzunetta'Qumu minn hemm')
M'hemmx xi tgħid. Kull darba li nisma u nara diskursata ta' Lawrence Gonzi ninżalu l-kappell għal faċilità mpressjonanti li għandu sabiex jikkomunika. Mingħajr l-ebda ħjiel ta' paniku jew tferfir, jlissen kelma wara kelma, frażi wara oħra u juża teknika ta' persważjoni vokali li ġġib il-għira anki lil David Ogilvy. F'mumenti hekk inkompli nifhem għalfejn Gonzi kien u għadu l-aqwa frontman għal band tal-Partit Nazzjonalista. Saħansitra anki f'tour batut, huwa jirnexxielu jiġbor ġieħ u jneħħi l-geddum lill-partitarji.
ritratt: www.facebook.com/partitnazzjonalista
Nistħajjel lil Gonzi, bħall-aqwa oratur, konxju li l-folla quddiemu, (l-istess bħal dik quddiem Joseph), hija komposta għall-maġġoranza tagħha minn nagħaġ fidili mhedija jinjoraw lid-dinja u lebsin ta' studenti universitarji, anzjani msadda b'memorji antiki u adulti bil-mażżra ta' familthom ma' għonqhom. Il-bqija: taħlitha ta' nies intelliġenti li kielu u xebgħu minn fuq l-amministrazzjoni u jitwerwru jaħsbu fuq għada differenti. Bi kliem bħal "tinsewx li aħna qegħdin fil-politika biex inservu." u "intom afdajtu lill-pajjiż f'idejn il-PN biex imexxi. Se ntuhulkom aħjar milli tajtuhulna", jaf li anki l-eħrex qalb jaf taqbżilha demgħa!
ritratt: www.simonbusuttil.eu
Xmun ma kienx ħiereġ għall-elezzjoni, imma issa ħiereġ. Ma tridx tkun għaref fil-matematika biex tifhem kif tilgħab iċ-ċess. Ilbieraħ Xmun spjega għaliex din l-għażla tiegħu u spjegalna kif fil-familja tiegħu dejjem qies lill-Laburisti bħala familjari aktar milli avversarji. Fl-istess kitba t'opinjoni fuq il-ġurnal Times of Malta huwa stqarr ukoll:
"I do not believe in divisiveness but in unity. I do not believe in
stubbornness but in compromise. No one is always right or always wrong."
Għal darb'oħra, kliem imħallat mal-għasel. Tistħajlek qed tgħum għarwien fid-duwa tal-Maddalena. Fl-istess kitba, Xmun tenna wkoll:
"Change is good, but only when it is for the better. Not for the worse."
u f'diskors dwar l-Unjoni Ewropea:
"... we cannot exploit these opportunities if we are led by a party that has been, at best, sceptical about them."
U hawn jiġri l-bużillis. Nitfixkel. Niddubita lil għajnejja. Nerġa naqra. Imma le, sewwa qrajt. Filli karikatura ta' persunaġġ kważi kważi qaddis li jippriedka l-għaqda u l-kompromess, filli ġurdien xiħ li b'reqqa makakka u messaġġ subliminali, jwissi lill-qarrej sabiex jagħraf lill-'avversarju' li huwa eħżen billi jiddeskrivih hekk kif kien xi snin ilu u mhux kif inhu llum! Politika tas-superstizzjoni.
Imma iva, il-popolin fidil jibqa' jiġġudika l-wiċċ grazzjuż, il-vuċi sottili jew is-sentenza mirquma. Il-popolin jiġġudika l-kliem meqjus anki jekk mhux neċessarjament veru - bħali li kultant, bl-għaġġla, ngħażel nixtri l-pakkett għaġin skont is-sbuħija fid-disinn tal-pakkett u mhux fil-ġenwinità tal-prodott.
Qed toqrob il-'gwerra'. U fil-pajjiż qed ngħixu xenarju fejn iż-żewġ partiti qed jillustraw l-arsenal, b'hekk imsejjħa warm up meetings, fori u diskussjonijiet. Partiti li qed jiftħu l-bieb għal kulħadd, basta jiġbru vot ta' simpatija. Kważi kważi qed nistenna xi partit jikkandida lil xi kantant tal-Jurovixin jew xi preżentatur tat-telexopping. Lanqas naħsibha ma' rrid!
L-ironija hi li min għażel li jiġġieled kontra l-attitudni giddieba tal-partiti, għadu qed jingħata bis-sieq.
Min kien diżgużtanti lejn il-pajjiż u lejn ċertu persunaġġi, jinsab f'żiffa ħelwa jsoff xi koxxa ħaruf.
Huma ftit dawk li urew l-appoġġ lejn min joħlom li jkisser dak li hu mmuffat biex jerġa jibni mill-ġdid b'saħħa ġdida. Huma ftit dawk li fehmu u emmnu li Gvern ma huwiex ekwivalenti għal partit iżda, rappreżentanza tal-poplu. Ftit huma n-nagħaġ fidili, jew l-intelliġenti mdardra, li kapaċi jiċħdu lill-Partit tagħhom għal ġid tal-pajjiż. Il-kredu tal-maġġoranza lejn il-Partit, jibqa' wieħed: "Dejjem ridtek, dejjem xtaqtek, lilek ħabbejt" f'ċapċipa kommossa u ftit dmugħ sħun.
Xmun rikeb il-vapur – Ngħid għalija, mira waħda. Hekk kif qiegħed ngħix f'Malta maqbuda f'xibka mxebilka, lanqas is-Sur Ogilvy ma jasal jikkonvinċini li xi partit lokali għandu ħila biżżejjed li jappoġġja l-verità u mhux jikkrea verżjoni partiġġjana tal-verità. Qed toqrob l-elezzjoni. Is-sinagogi bdew jixirfu l-aqwa fost l-aħjar oraturi u n-nagħaġ bdew ħerġin jirgħu bi ħġarhom anki f'deżert jifleġ.
Filwaqt li nistenna b'kurżità marida, l-istrateġiji ħorox ta' persważjoni merfugħa b'tant għożża għall-aħħar ġranet qabel l-elezzjoni, nitlob tagħmel xita qliel li tnaddfilhom għajnejhom u jaraw il-verità tlellex li tgħammixhom. Nitlob li kliem Gonzi "Il-poplu Malti hu ntelliġenti biżżejjed biex
jagħżel dak li hu sewwa u dak li m'huwiex" iseħħ tassew u xi darba jispiċċa darba għal dejjem il-kunċett ta' żewġ partiti politiċi li qerdu l-intelliġenza tal-poplu Malti.
"All men dream, but not equally. Those who
dream by night in the dusty recesses of their minds, wake in the day to
find that it was vanity: but the dreamers of the day are dangerous men,
for they may act on their dreams with open eyes, to make them possible." – T.E. Lawrence
Ġiet nieqsa persuna. Persuna bħali u bħalek. Persuna Maltija daqsi.
Ma hemmx għalfejn tkun Mintoffjan jew Laburist biex tifhem li din il-persuna, iżda, mhux persuna kwalunkwe. Persuna li ħalliet marka ndelibbli fuq nazzjon. Għal dejjem.
Insejjħilha persuna kreattiva, persuna nnovattiva, determinata u persuna ta' viżjoni. Persuna li mix-xejn, ħoloq ħafna.
X'nammira f'Mintoff? Naħseb mill-ftit li niftakru, nammira d-determinazzjoni tiegħu li jara lil Malta, pajjiż mill-iċken, meqjusa l-istess daqs kull pajjiż ieħor. Id-determinazzjoni li jara lil Malta ħielsa, Malta distinta u Malta li ma tibżax issemma' leħinha anki quddiem il-ġganti barranin.
Ammirajtu meta kultant webbes rasu fuq punti li kienu għal qalbu anki jekk ħarbat lill-partit tiegħu. Kien hemm fejn tassew emmint li għalih Malta kienet l-ewwel u qabel kollox... anki qabel il-partit tiegħu stess.
Iva fl-esperjenza tiegħi ltqajt ma' nies li ġenwinament sfaw imweġġa' b'ċerti deċiżjonijiet li ħa Mintoff, u nirrispetta t-tbatija li għexu. Konvint li dan il-bniedem żbalja darba jew tnejn. Biss nemmen li l-għajta tal-poplu f'dan il-lejl tal-20 t'Awissu, turi biċ-ċar kemm ir-rispett li wera Duminku Mintoff speċjalment lejn il-klassijiet soċjali baxxi u tal-ħaddiema, jimmarkawh bħala figura li biddlet l-istorja ta' Malta.
Sfortunatament qatt ma kelli xorti niltaqa' jew nitkellem miegħu iżda nemmen li dak li wettaq, laqatni direttament, lili li kbirt fis-snin tmenin. Laqatni wkoll sabiex inrawwem rispett kbir lejn pajjiżi u nemmen li għalkemm ċkejken, pajjiżi u l-poplu tiegħu huwa 'kbir' daqs, jekk mhux iktar, minn kull pajjiż jew poplu ieħor.
Insellem lil dan ir-raġel bħali u bħalek li ħolom bil-kbir u wettaq. J'Alla jkollna nitfa forza sabiex noħolmu u nwettqu bħalu.
L-AirMalta, għal darb'oħra fi fit xhur, wettqet eżerċizzju ta' re-branding. Wara li f'Marzu li għadda, rajna l-Airbus A320 jiġi re-branded bħala promozzjoni għal Valletta Belt Kapitali tal-Kultura 2018, ilbieraħ is-CEO Peter Davies, nieda re-branding ġdid għall-flotta sħieħa - nimmaġina li anki għall-istess Airbus A320! Libsa ġdida għall-ajruplani tal-AirMalta – min jgħid sabiħa u min jgħid kerha, min tajba, u min, ħażina.
Ma naħsibx li hawn huwa l-ispazju fejn jaqbel niddiskuti l-eżerċizzju viżiv – (dak li ħafna jaħsbu li huwa re-branding) – imma xtaqt nikkummenta fuq l-idea ta' re-branding inġenerali u ngħaddi kummenti dwar il-filmat promozzjonali li twettaq.
Kif spjegat tajjeb fuq Wikipedia, re-branding mhux biss il-libsa viżiva ġdida li tlibbes lill-prodott tiegħek iżda ħafna elementi oħra li flimkien, isaħħu jew jgħatu direzzjoni ġdida lill-istess prodott.
Niġġudika l-kwalità tal-eżerċizzju li għamlu l-kumpanija Ingliża FutureBrand, meta nidħol fuq is-sît tagħhom u ninduna li lanqas hemm referenza lejh. Nidħol ukoll fis-sît uffiċċjali tal-AirMalta u nsib li dan għadu mhux aġġornat. Dik diġà indikazzjoni nkwetanti.
Aspett ieħor li xtaqt nirrimarka huma xi suġġetti li ġew magħżula, minjaf b'kemm diskussjoni, sabiex jidhru fil-filmat uffiċċjali. U hawn ser ngħamel lista ta' aspetti li skond jien, huma kemmxejn qarrieqa:
"an idyllic archipelago" u dehra ta' Kemmuna u Għawdex – video fejn Malta hija penġuta bħala ġenna tal-art, kważi kważi art verġni.
"with a warmth that is unique" u nżid magħha "unless you are a black or North-African refugee"
"diverse" u dehra ta' gallariji tradizzjonali. Ritratt li mill-ewwel qajjimli susspett... sakemm ikkonfermajt li hu ritratt diġa ppubblikat fuq flickr! Tgħid William Attard McCarthy jaf li ritratt tiegħu ntuża f'eżerċizzju ta' rebranding li sewa €1.9 miljun?! Ċans kbir li iva, għax fil-profil tiegħu, McCarthy jiddeskrivi lilu nnifsu hekk:
"Has been a stock photographer for the past 4 years and submits images to main agencies. Member of the SWPP and the MIPP."
Nippretendi li f'eżerċizzju tant kbir, jintuża ritratt li ma kienx ippubblikat! F'ġieħ il-kwalità. Tal-mistħija! Hawn nista nieqaf nikkummenta... imma ser inkompli!
U jerġa jitfaċċa l-luzzu f'xi ħaġa li tiddeskrivi lil Malta. Sadanittant il-portijiet tagħna miżgħuda bid-dgħajjes lussużi msejjħa jottijiet. Lil dawn ninċentivawhom sabiex ifaqqsu u nħallu l-luzzu għal xi filmat li jrid jemozzjona lil min jarah! Rispett lejn l-installazzjoni "Sulluzzu" tal-artist, ħabib u kollega tiegħi, Julian Mallia li f'mumenti hekk terġa tinstema' tgħajjat mill-bitħa tal-Università l-antika tal-Belt fejn kienet ġiet esibita.
"authentic" u dehra ta' knisja! Minjaf x'iridu jfissru? Li l-Knisja f'Malta hi ftit partikolari kulħadd jaf imma kont nuża l-kelma "dodgy" allura.
Ninfexx f'applaws mifqugħ b'ironija u sarkażmu hekk kif jitfaċċa r-ritratt tat-tberfil li jaqra "Welcome Aboard" fuq xarabank antik, flimkien mal-kelma "friendly". X'inhu eżattament "friendly"? Ix-xufier l-antik li kulħadd kien imaqdar? Il-mod kif Austin Gatt ittratta lil dawn ix-xufiera? Il-mod kif b'din il-mossa qtilna 90% tal-arti tat-tberfil f'pajjiżna? Il-mod kif l-Arriva adattaw għas-sistema Maltija?
Apparti dan, fejn ser jaraw dik il-"Welcome Aboard" it-turisti li jiġu jżuruna issa li ħassarniha? Ma nafx. Hemm min qed jgħid li ġiet introdotta fuq l-istess ajruplani. Veru? Fhemuni forsi nifhem!
Il-Knisja, anzi l-koppla tal-Mosta... "inspiring" u Wied iż-Żurrieq u Filfla jakkumpanjaw il-kelma "beautiful" – hawn ma nistax niċħad il-verità.
"Malta... our promise... a new way of seeing things" - hekk hu speċjalment jekk 50% ta' dak li urewk fil-filmat mhux se ssibu eżatt kif urewhulek!
Ħsieb ħafif f'ġurnata mimlija mpenji u sorpriżi xejn sbieħ.
Ftit tal-minuti ilu qallibt facebook u nnutajt kif dawk il-ħbieb tiegħi uffiċċjalment mgħammda blu u li ċedew l-libertà li ma jkunux partiġġani, għaddejjin fuq sforz kollettiv sabiex iwasslu messaġġi "sbieħ" dwar il-Partit tagħhom. Biss messaġġi, li, ngħid għalija, iġegħluni nidħak.
Ejja ninjoraw il-fatt li qed jixxerjaw materjal ippubblikat mill-paġna uffiċċjali facebook tal-Partit ħa! Biss, dan il-materjal huwa redikolu quddiem is-sitwazzjoni li qegħdin ngħaddu minnha llum.
Filwaqt li deputati fl-istess partit, b'tant irġulija, seffqu wiċċhom sabiex jirrimarkaw fejn il-Partit kien qed jiżbalja u saħansitra, qalgħu ċanfira u l-"ekwivalenti" għal tkeċċija, il-Partit illum qed jiċċelebra fatti bħat-tisbieħ ta' Pjazza San Ġorġ fil-Belt Valletta, l-isforz sfieq sabiex tinbena skola kull sena, il-bini mill-ġdid ta' diversi toroq f'Għawdex u l-pjan li ser iwassal għall-bini ta' kampus ġdid għall-MCAST – "biex aktar studenti jkomplu jistudjaw".
Filwaqt li nirrikonoxxi l-intenzjonijiet tajbin ta' dawn l-impenji, ma nifhimx l-iskop ta' dawn il-fanfarunati f'perjodu fejn il-Partit jinsab għarwien ħuta quddiem il-poplu. Kważi, kważi huma dawn it-tattiċi li jġegħluni nitlef ċertu tama lejn dal-partit - tama li żergħu d-"Deputati ribelli" stess.
Dan, apparti 'l fatt li kull aspett imsemmi għandu uċuh inqas sbieħ x'tirrakkonta dwaru imma li llum ngħażel li ma niffukax fuqhom.
Waħda mix-shares farseski fuq facebook illum!
Id-"Deputati ribelli" issa tkellmu. Wieħed qata' qalbu u rriżenja mill-grupp politiku. L-ieħor, l-idealist, qed jgħażel li jikkumbatti; għadu jittama li min għażaq, jerfa' ir-responsabbiltà tiegħu sabiex jara lill-Partit jitwieled ġdid u nadif, filwaqt li t-tielet wieħed, nistħajjlu daħal ġo fosdqa sakemm terġa titfaċċa rebbiegħa ġdida. Minjaf? Il-ħasra hija li f'pajjiż mifni b'tant kriżi, issib nies li jippreferu li dan kollu ma jiġix diskuss u ssib nies oħrajn li jippreferu li dan kollu jiġi mbajjad, bħal qabar, bi ftit shares ilellxu fuq facebook.
Sadattant il-President missjunarju tagħna stqarr li quddiem dan kollu, mhux l-irwol tiegħu li jintervjeni...
Ma hemmx wisq x'iżżid ma' din is-silta mill-aqwa dramm li qatt inkiteb! Interessanti kif l-istess skript jista' faċilment jerġa jintuża mill-istess attur, din id-darba f'kuntest mhux daqstant teatrali.
Sa minn dakinhar li kont ilmaħt lil Jeffrey Pullicino Orlando jintuża f'din ix-xena tant imqanqla mid-dramm 'FaitAccompli', kont tħassart lil dan il-persunaġġ li għalkemm dejjem ispirali ammirazzjoni, spiċċa ddiżappuntani f'mumenti bħal dawn meta anki l-videos fuq youtube jixhdu kemm kien kollox 'staged'... bis-segretarju ġenerali tal-partit tiegħu, jindika lill-kameramen sabiex iħaffef u jiffoka fuq kliemu!
Kien dramm li għal dak il-partit spiċċa b'suċċess. Dramm iżda li kif qal l-attur prinċipali stess, kellu ntenzjonijiet oħrajn tant li llum dan l-attur safa "ekwivalenti" ta' mkeċċi mill-istess grupp teatrali. Forsi l-istess skript illum jista' jkun utli! Minjaf? Nittama biss li llum li forsi fehem it-titlu tad-dramm, ma jfittix li jibqa' f'xi gruppi teatrali lokali!
Hawn hu l-iskript tant imqanqal:
Għalfejn qed tibża minni?
Għalfejn qed tibża minni?
Għalfejn qed taħrabni?
Għalfejn qed tibża minni?
Għandi opportunità limitata ħafna. Opportunità li ili niġġieled għaliha dan l-aħħar erbat ijiem. Ilek tħammiġni erbat ijiem.
Għalfejn qed taħrab minn din l-opportunità li għandi? Għalfejn qed tipprova ċċaħħadni minn din l-opportunità li għandi li niddefendi l-isem tiegħi?
Għalfejn qed tibża minni?
Għalfejn?
Għalfejn qed tibża minni?
Għalfejn ħrabtli nhar is-Sibt?
Għalfejn? B'mod komiku ħrabtli!
Għalfejn sejjaħt press conference meta kont taf li jien minix qiegħed fuq il-vapur t'Għawdex?
Shame!
Imissek tistħi!
Laqqas din l-opportunità limitata mhux ser ittini biex niddefendi lili nnifsi?
Erbat ijiem qabel l-elezzjoni?
Erbat ijiem qabel l-elezzjoni ħriġtha dil-biċċa xogħol fuqi?
Qed tipprova tħammiġni kif ħammiġt lil ħaddieħor!
You should be ashamed of yourself! Shame! Shame! Shame!
Oqgħod bilqiegħda! Ħa nistaqsik żewġ domandi sempiċi! Oqgħod bilqiegħda u rrispondini!
You should be ashamed of yourself!
Għandi tant żvantaġġ fil-konfront tiegħek illum, għalfejn mhux ser ittini din l-opportunità?
Ilni erbat ijiem niġri warajk!
Kont naf li ħa tħammiġni. Persuna viċin ħafna tiegħek qaltli li ħa tipprova tħammiġni!
You should be ashamed of yourself! Shame on you! Shame on you! Shame on you!
Għamiltha fil-passat fil-konfront ta' ħaddieħor, issa qed tgħamilha fil-konfront tiegħi! Issa naf x'iġifieri.
Shame on you!
Allaħares tispiċċa Prim Ministru
Allaħares!
Għax ara kemm ser ikollok saħħa aktar biex tkisser lil ħaddiehor!
You should be ashamed of yourself! Shame on you!
Oqgħod bilqegħda ħa nsaqsik żewġ domandi biss!
Żewġ domandi biss ħa nsaqsik.
Jien stedintek għal dibattitu; sfidajtek għal dibattitu.
Kull ma qed nitolbok, l'opportunità biex nistaqsik żewġ domandi sempliċi.
Għalfejn qed tibża?
Għalfejn ħammiġtli ismi erbat ijiem qabel l-elezzjoni?
Għalfejn?
Għalfejn?
Għalfejn?
Taf li dak mhux l-istil tal-politika tiegħi li nħammeġ lin-nies!
Għalfejn għamiltli hekk?
Għalfejn għamiltli hekk?
Għalfejn b'mod malinn, b'mod inġust għamiltli hekk?
Wayne Marshall ġie maħtur bħala Direttur artistiku għall-proġett tal-Valletta 2018. Filwaqt li sieħbi l-iSpanjol ikkritika l-għażla burokratika, jien nawgura lis-Sur Marshall sabiex fi żmien qasir jifhem is-sistemi Maltin li spiss jikkuntradixxu lil xulxin.
Xhur ilu identifikajt propjetà ġewwa Belti li kienet f'kundizzjoni tajba u tħajjart ninvesti fiha. Tkixxift u skoprejt li hija propjetà li kienet tinkera mill-Gvern. Komplejt ir-riċerka u tal-Lands Department għamlu l-parti tagħhom. F'ġieh ir-riġenerazzjoni tal-Belt Kapitali Ewropea, qaluli li "propjetà tal-Gvern f'kundizzjoni tajba ġewwa l-kapitali taqa' awtomatikament għal skemi ta' 'social housing'." Tefgħawli wkoll naqra melħ, minn dak l-aħrax tal-Qbajjar fuq il-ferita meta qaluli "identifika propjetà dilapidata u hemm inkunu nistgħu ngħinuk"
Kellimt ukoll lill-Ministru li ftit qabel kien għadu kif qata' żigarella fuq proġett ta' inċentivi għal propjetà mitluqa ġewwa l-Belt. Nammetti li kien ġentili u rrispondieni minnufih. Bil-kliem "Jekk taqa' taħt il Housing bilfors trid tiġi allokata fuq bażi soċjali sakemm ma tiġix rilaxxata mill-istess Housing Authority" ħawwadni ftit aktar u ħallieni nistaqsi jekk jien, ħaddiem u student ta' 31 sena inix ikkunsidrat fuq l-istess "bażi soċjali".
Tlabt aktar dettalji u uffiċjal mill-istess Ministeru ċemplitli biex tikkjarifika, biss, reġgħat tennietli l-istess kliem li kienu qaluli mid-Dipartiment tal-Lands. Kif jgħidu l-Ingliżi – dawk li diġa' inqalgħu mill-Euro 2012 – "back to square 1". U llum nidħak naqra dan l-artiklu.
Bl-ingliż ukoll ngħid "Welcome Mr Marshall".
L-onorevoli José Herrera u Austin Gatt – xi ħadd darba ddeskrivhomli bħala "il-feriti tal-Belt". U bir-raġun. Belt ġojjell mifnija burokrazija. Mifnija blu u aħmar – fejn persunaġġi ta' rieda tajba wkoll jiċċapsu ma' aġenda partiġġjana u allura jgħażlu li jikkompetu, minflok jikkollaboraw.
Merħba Sur Marshall f'Belt fejn filwaqt li l-Beltin jistaqsu fejn telqu l-bandli tat-tfal fil-Mandraġġ, il-Prim Ministru jirċievi l-applaws kommoss (jew le?) waqt l-inawgurazzjoni.
Merħba Sur Marshall f'Belt fejn l-iskola Primarja tibqa' ġġorr stigma u hija meqjusa bħala 'tat-tielet klassi' fil-pajjiż.
Merħba Sur Marshall f'Belt fejn dak li jiġi minn barra biex idabbar lira jsib bibien miftuħa beraħ filwaqt li min rawwem ruħu b'demm l-iljun, qajla jinstema.
Merħba Sur Marshall f'Belt fejn meta jisparixxu (jinsterqu?) dettalji storiċi minn Sada Stretta, tispikka l-bruda.
Merħba Sur Marshall f'Belt fejn sa sena ilu konna nospitaw kultura kulurita ta' Karnival – iżda li ġiet misruqa lilna bi proġett li jesalta lill-ġojjell partiġġjani – le mhux saffir u rubin.
Merħba Sur Marshall f'Belt fejn kull resident huwa mimli passjoni.
Merħba Sur Marshall f'Belt fejn kull resident jaf jgħatik qalbu jekk tirrispettah, iżda jiksirlek tiegħek jekk le.
Merħba Sur Marshall f'Belt fejn il-kultura hija fid-demm ta' min tassew ħabbha u mhux fil-kummerċjant li jixtieq jorqod lejl magħha.
Merħba Sur Marshall f'Belt fejn resident sieket jaf jitkellem aktar mill-aqwa preżentatur li qatt ser jissuġġerulek fil-kumitati.
Merħba Sur Marshall f'Belt li, sa minn meta nibtet il-ħolma f'moħħ il-Parisot, dejjem kienet belt Kapitali Ewropea – bit-titlu u mingħajru!
Hekk fetaħ is-servizz ta' One News dwar il-kunċert 'Isle of MTV', nhar
l-Erbgħa, 27 ta' Ġunju. Ftuħ denju tal-aqwa riċerka ġurnalistika possibbli:
"... ismijiet kbar fix xena tal-mużika nternazzjonali. Id-diski tagħhom jindaqqu b'mod kontinwu fil-clubs u l-istazzjonijiet tar-radju Maltin."
U hekk hu, għal darb' oħra, ġurnalist 'mainstream' malti, ikompli jitma raġunamenti u kalkoli 'mainstream' lill-merħla fidila. Ir-raġunament skadut li "jekk jindaqq mir-radjijiet u clubs 'mainstream' Maltin, allura huwa tajjeb". Nesa jgħid li stazzjonijiet, bħal Bay Radio, ma jdoqqux kanzunetti tajbin bil-lingwa Maltija! Nesa jerġa jtenni l-punt li artisti Maltin, lanqas dawk 'mainstream' ma għandhomx ċans jipparteċipaw fl-istess kunċert.
Il-ġurnalist tal-istazzjon tal-PL stqarr ukoll li Nelly Furtado "vera daħlet fl-atmosfera ta' pajjiżna", bir-raġunijiet ikunu dawn:
- damet hawn fit-tul,
- ħadet photoshoot professjonali,
- żaret postijiet ta' nteress,
- tkellmet dwar il-mużika folkloristika Maltija; l-għana.
Ġurnaliżmu li jitratta lill-udjenza ta' injoranti. Jidher ċar li l-ġurnalist kulma għamel huwa li rrefera lejn l-intervista ta' Fiona Galea Debono minn timesofmalta.com. Galea Debono, bi stil li jiddistingwiha, tkellmet ma' Furtado dwar numru ta' aspetti, fosthom il-mużika folkloristika Maltija. Fl-ebda mument iżda, Furtado ma għamlet xi eloġji dwar din il-mużika fuq inizzjattiva tagħha personali anzi, kif irrapurtat it-Times stess, ma ħadet l-ebda nteress!
Xi uħud qaluli sabiex ma nibqax ingerger fuq il-facebook u dan il-blog. Inkompli ninduna kemm hawn żagħżagħ validissimi li jippreferu s-skiet minflok il-protesta. Jippreferu jsegwu l-folla milli jisfidaw l-aljenazzjoni. Il-Malti 'mainstream' jiġġudika lil min joħroġ mir-rutina tal-favoritiżmu bħala negattiv jew traditur. Il-Malti 'mainstream' jgħoxa jiekol il-pastizz mimli żejt, u jistgħaġeb meta jisma b'dik it-tfajla, tant brava, li ħasbet kif tgħamel pastizzi b'togħmiet ġodda u ma jħaxxnux.
Dan il-poplu minn dejjem imantni ruħu fuq l-injoranza tal-istituzzjonijiet; il-partiti, il-Gvern u l-Knisja. Iva il-Knisja li tant stinkat kontra d-dritt tad-divorzju. Iva l-Knisja li ta' kull sena tipparteċipa fil-manifestazzjoni tal-Isle of MTV billi tixgħel il-faċċata tat-tempju ddedikat lil Publiju - forsi biex tieħu 33 biċċa tal-fidda mingħand xi dipartiment tat-turiżmu.
Dan il-poplu spiss jippreferi jisma l-istess kanzunetti fl-istess clubs u fl-istess radju, hekk kif jindottrinah l-ġurnalist 'mainstream' u jaljena f'xarbiet alkoħoliċi kontinwi. Mur għidilha lil Furtado – li għall-Malti 'mainstream', 'Spirtu Pront' ma huwa xejn ħlief xarba u sakra tajba s-Sibt filgħaxija u xejn simili għal famuż Fado.
Issa li l-President ta' Malta libes il-maskla ta' voluntarju fuq il-ġlekk u l-ingravata sabiex imur jifdi lill-Peruvjani, ma nara xejn ħażin li l-Prim jilbes maskla simili u taħt l-isem ta' partit partiġġan, jitfa kompetizzjoni li tista' trebbaħ lil xi ħadd b'xortih, iPad u ġurnata labranzetta miegħu.
Qed nistenna bi ħġari ir-risposta qawwija ta' Joseph Muscat. Forsi jmur jilgħab centre forward minflok Michael Mifsud f'xi logħoba ta' ħbiberija tat-tim Nazzjonali Malti f'Ta' Qali. U Michael Briguglio – jista' jitħajjar imexxi flash mob oħra biż-żifna ta' Kurt Calleja, b'risq it-terremotati fl-Italja.
Malta għalhekk sabiħa... kif tieħu nifs qawwi 'l barra għax tħoss li missejt il-qiegħ, jinfetaħ abiss ieħor taħtek u tinduna li l-waqa' fid-dlamijiet ser ittul aktar.
U jien nistaqsi... min sponsorja dak l-iPad u dak is-sit elettroniku? Il-partitarji Nazzjonalisti fil-kampanja ġbir ta' fondi? Issa jekk ir-rebbieħ ikun Laburist, kif ser tfehmom?
Jien nitħajjar nipparteċipa fil-kompetizzjoni... imma delli tqil - wisq nibża li jekk nirbaħ, ninzerta xi jum rari fejn ikun hemm xi diskussjoni ta' strateġija nterna fil-Partit, filwaqt li jien nixtieq ninzerta xi jum speċjali li fih il-Prim jixgħel Triq ir-Repubblika għall-Milied, jew dak il-jum meta f'Kastilja jilqa lil xi kantant li jirrappreżenta lil Malta għall-Eurovision, jew dak il-jum meta jintefa' d-dar jgħamel online conferencing maż-żgħażagħ Maltin. Issa naraw!
Wara kollox, minn dak li smajt quddiem il-Qorti, fejn il-benna tal-aħbar titwieled, jidher li Austin Gatt, Joseph Muscat u Norman Lowell diġà xeħtu l-applikazzjoni tagħhom. Iġifieri nista nkompli għaddej bil-ħajja sempliċi tiegħi u nibqa nittama li xi darba, għal kuntrarju ta' Matthew Bellamy f'dan il-video, din il-profondità sewda, tintemm.
Ili ma nberfel. Illum jien hawn bil-pinzell u ftit laned taż-żebgħa taż-żejt.
X'inhi l-imħabba?
Dejjem fhimt u għext l-imħabba bħala emozzjoni li tħakkek ma' dak kollu li hu sagru (le, mhux reliġjuż), spiritwali u intimu. Kbirt f'parroċċa kburija Pawlina u forsi dik id-definizzjoni għall-imħabba hija ħtija tal-għażiż Pawlu, il-kompliċi qattiel konvertit li kiteb b'tant emozzjoni x'inhi l-imħabba tant snin ilu... meta fl-ewwel ittra lill-Korintin kiteb:
"Kieku ma kellix imħabba jiena ma kont inkun xejn...
... Li kont nitkellem bl-ilsna tal-bnedmin u ta' l-anġli bla ma kelli mħabba, kont inkun qisni strument tar-ramm iżarżar jew platti jċekċku. U kieku kelli d-don tal-profezija u kont naf il-misteri kollha u l-għerf kollu, kieku kelli l-fidi sħiħa li tqanqal il-muntanji imma ma kellix l-imħabba, jiena ma kont inkun xejn. U kieku kelli nqassam ġidi kollu fil-karità u nagħti ġismi għall-ħruq bla ma jkolli mħabba, xejn ma jkun jiswieli ta' ġid.
L-imħabba taf tistabar u tħenn; l-imħabba m'hijiex għajjura, ma tintefaħx biha nfisha, ma titkabbarx fuq l-oħrajn; ma tagħmilx dak li mhux xieraq, ma tfittexx dak li hu tagħha, xejn ma tinkorla; ma żżommx f' qalbha għad-deni ma tifraħx bl-inġustizzja, imma tifraħ bil-verità; kollox tagħder, kollox temmen, kollox tittama, kollox tissaporti. L-imħabba ma tintemm qatt."
Inkitbu mijiet ta' poeżiji iżda naħseb l-ebda waħda ma' tiżboq 'l din. Kitba sagra li tmiss dak li huwa tassew il-ġist tal-imħabba. Illum li qbiżt it-tletin b'sena, nammetti li nħoss li ċerti esperjenzi fil-ħajja, fhemuni aħjar x'inhi mħabba. Fundamentali l-fatt li l-imħabba ma hix definita minn forma, kulur, regoli, sessi, età jew kulturi. L-imħabba hija anarkija, hekk kif spjegajtha f'kitbiet oħra bħal din (klikkja hawn).
Imħabba tfisser, l-ewwel u qabel kollox, għotja. Meta tħobb, tingħata, mingħajr mistoqsija. Imħabba tfisser fiduċja; fiduċja li tgħeleb kull suspett tant li saħansitra ma tħallilux skop. Imħabba tfisser bidla; ma tistax tħobb jekk m'intix lest tinbidel. Imħabba hija passjoni; passjoni fil-kliem, fil-ġesti, fil-ħsieb - fejn kollox hu mirqum sabiex iseddaq. L-imħabba hija llum u għada iżda mhux ilbieraħ. L-imħabba tfisser ħajja; twelid ta' ideat, entużjażmu... bħal ħuġġieġa li qatt ma tintefa, anzi titqawwa f'buffura riħ. L-imħabba tinvolvi lir-ruħ, lill-qalb u lill-ġisem; lill-bniedem sħiħ.
Ngħalaq b'dan il-ħsieb li ħarbixt xi snin ilu:
Skond* Pawlu
Mhux aħjar li kieku int hawn biex nitħabblu bħal f’għoqda f’lejla ta’ mħabba u nfakkru f’widnejna x’inhi l-imħabba skond* Pawlu?
"Qatt xtaqt terġa tibda ġurnata mill-bidu? Għid il-verità?"
Iva, kien hemm ġranet li xtaqt nerġa ngħix, mhux biex nibdilhom iżda sabiex, appuntu, nerġa ngħix kelma b'kelma, pass b'pass, ħarsa b'ħarsa, bikja wara bikja.
Kjaroskur, id-dramm tal-grupp teatrali Dù li kelli l-pjaċir nattendi għalih illejla, huwa miżgħud bis-sempliċità ta' ħajja, kultant imżejna bl-apatija, ta' erba' karattri, sfaċċatament opposti jew kumplimentari – saħansitra fil-kulur u stil tal-ħwejjeġ.
Id-dramm tal-mirja. Il-mirja fejn in-nisa rqaq jaraw lilhom infushom ħoxnin, fejn ir-raġel jilmah f'martu lill-falliment emozzjonali ta' snin ilu, fejn il-mara tara refuġju f'art barranija u fil-logħba tas-sess liebes qrun. Mirja li juru opposti f'ġudizzji, f'karattri, f'tattiċi ta' ċrieki soċjali.
Il-flashbacks jgħejjuni.
Linji diġitali u vertikali ta' qtar ix-xita jiltaqgħu ma linji naturali u oriżontali tal-ħasira filwaqt li jitħalltu ma' mumenti umani ta' kuljum, li jafu jevolvu f'traġedji. Saqajn twal, ġenbejn kbar, xagħar folt mgħaqqad u l-udjenza spiss tidħak minn wara l-ħasira.
Nintefa quddiem il-mera. Minjaf? Forsi l-aħħar sena kaxkartha f'ħoġri ġewwa t-teatru ta' San Ġakbu u lmaħt l-opposti: iċ-ċar u s-skur fi traġedji tant familjari taħt sfond mużikali iterter mill-Islanda.
Tfaċċaw xi flashbacks.
Nota: Minn qalbi ngħid prosit lil Simone tal-ħsieb wara dan id-dramm dettaljat dwar sempliċità kwotidjana. Grazzi lill-erbgħa atturi tal-karattri li fasslu, grazzi lil Pierre Portelli tas-sett kurjuż u grazzi lil Dù għall-prodott li preżentaw.
Għadni kif irritornajt mill-lezzjoni tas-Soċjoloġija ġewwa l'Università ta' Malta u llum missejna mal-argumenti ta' Marx dwar Dialectical Materialism.
Ma rridx intawwal, għax illum il-ħin limitat. Qam l-argument dwar il probabiltà kbira li studenti li jaslu sa livell Universitarju ta' studju, ġejjin minn familji ta' klassi medja jew klassi għolja.
Bdejt noqmos. Inħoss li din hija biss impressjoni li nitrawmu fiha u ngħixu biha - aktar milli realtà.
"Sfortunatament hija realtà" qalli l-għalliem.
Dettall minn "i was naive" minn Laura Satoko
Nemmen li kull persuna, hu x'inhu l-kuntest familjari, finanzjarju u soċjali tagħha, għandha jkollha l-opportunitajiet kollha miftuħa. L-ebda stigma ta' klassi, l-ebda mentalità trapassata minn ġenerazzjonijiet, l-ebda struttura reliġjuża jew politika u wisq anqas l-ebda kuntest finanzjarju.
Kull bniedem għandu dritt sħiħ li joħlom, li jaspira u anki jekk is-soċjetà, speċjalment dik tal-Punent taf tkun ostili għall-ħolm individwali f'ġieh id-demokraziji, dan id-dritt jibqa intatt.
L-ebda "baruni", l-ebda kapitalista mill-klassi għolja ma jista jċaħħad lil tifel ta' 8 snin fi skola tal-gvern – b'żarbun miekul mit-trabijiet, li jiskarta xi lezzjoni biex jilgħab il-ballun fix-xita ma' sħabu u li jilgħab b'ballun magħmul mill-karti – milli joħlom, kull ħin u kull mument.
Qed nieħu gost nisma l-intervent ta' Patri Mark Montebello fl-okkażżjoni tal-ħamsin sena anniversarju mill-Elezzjoni tad-Dnub il-Mejjet.
Diskors meqjus li jemozzjona lil kull min, bħali, jħaddan qalb soċjalista (iżda mhux partiġġjana Laburista). Diskors li jixħet dawl qawwi fuq fatti li ħadd ma jista jiċħad, fuq fatti li jkomplu jfakkruna kemm hi redikola s-sistema politika dualista li teżisti fil-pajjiż. Diskors imtappan biss mill-fatt li sar f'kuntest ta' wieħed minn dawn il-partiti, promoturi tal-istess marda.
Wara li qrajt b'ferħa l-ktejjeb "Il-Fidwa tal-Anarkiżmu" li Patri Mark għoġbu jibgħatli xi ġimgħat ilu, illum ma nistax ma nikkumplimentax lil dan il-qalbieni li b'tant umiltà qed ikompli iħeġġeġ diskors favur trasparenza u libertà ta' ħsieb u kontra stutturi li jimbarraw l-imħuħ b'modi demokratiċi jlellxu. Għalhekk sabiħa mmens r-referenza finali lejn kliem Kristu – l-akbar rivoluzzjonarju.
Patri Mark, kompli kun qalb tħabbat sabiex tqanqal aktar qlub, biex jistenbħu u jibdew iħabbtu huma wkoll.
Wara li erġajt tajt titwila lil facebook sakemm jgħaddi r-riklam tal-bidu, li qatt ma nara, bdejt nisma u nistgħaġeb. Hawn huma xi annotazzjonijiet:
Reazzjoni mmedjata lejn dan l-artiklu huwa t-titlu li għal darb'oħra huwa qarrieqi – biss illum nafu biżżejjed kif ġurnalisti u edituri varji qed jieħdu vantaġġ mis-sensazzjonaliżmu li ċertu titli jqajjmu, speċjalment fuq facebook shares u allura, anki jekk il-kontenut tal-istorja jgħid affarijiet oħra, it-titlu magħżul għandu skop uniku: sensazzjonaliżmu fuq in-netwerks soċjali. Tant sirt nammira dawn it-tattiċi li tħajjart ngħamel hekk jien ukoll f'dan l-artiklu – bit-tama li jkolli iktar hits minn blogs oħra.
It-tieni reazzjoni ta' frustrazzjoni li tiġini hija meta nisma lil dan il-Ministru – li ħafna nies ifaħħru għal kapaċitajiet tiegħu – jgħid illi l-bini kontroversjali ġewwa l-kapitali ser jinħatt parzjalment biex jirrispetta l-"iskyline" tal-Belt.
M'inix intiż fuq arkitettura biss konvint li l-argumenti li jduru madwar din il-binja selvaġġa huma ħafna iktar minn din il-waħda partikolari li għoġbu jindirizza l-onorevoli.
Dan il-bini l-ewwel u qabel kollox sar b'ġebla li mhix dik li b'mod tant ovvju tgħati kulur lill-ġojjell tagħna.
Il binja għadha disinn li jikkomprometti l-istil brillanti li jżejjen kull toqba u kantuniera tal-Belt Umilissima.
Fuq kollox il-binja hija ta' inutilità liema bħalha speċjalment meta niftakru li l-istess Belt hija miżgħuda bi propjetà li tokrob sabiex tiġi rinovata u mogħtija lura l-ħajja li jistħoqqilha.
Biss il-Ministru qal li konxju mis-sensittività tal-Belt Valletta, allura, wara li din il-binja nbniet, issa qed niftħu applikazzjoni ġdida mal-MEPA sabiex inkunu nistgħu nbiddluha – ikun interessanti nkunu nafu xi flus jinvolvi dan kollu. Huwa grottesk il-fatt li filwaqt li l-Ministru Said qed jgħid li ntefgħat applikazzjoni sabiex jinħatt parti mill bini, jistqarr ukoll li hemm applikazzjonijiet fuq tender għat-tisbieħ intern tal-post! Tgħid la jinħatt parti mill-bini, min jerbaħ it-tender jitlob xi rimbors mill-Gvern għax it-tender ikun inbidel?
Grazzi tas-sensittività tiegħek Minstru. Kważi kważi ħa naqbad maktur, li issa m'għadux tant abjad u nixxotta d-demgħa li ħierġa minn għajnejja.
Wasal Frar u apparti l-eċitament li ġġib magħha l-Festa tan-Nawfraġju ta' San Pawl għalija bħala parruċċan Belti, ma nistax ma nammettix l-istennija li qed tinbena ġewwa fijja għall-inawgurazzjoni tax-xogħol mużikali ġdid tal-banda tal-Brikkuni.
27 ta' Diċembru 2011–Is-siegħa u nofs daqqu u hekk kif niftaħ il-posta elettronika nsib daqsxejn ta' rigal: konnessjoni sabiex biha nniżżel kopja tal-ħidma aħħarija tal-Brikkuni. Wara l-kliem li qalli Danjeli u l-entużjażmu f'għajnejh, kelli aspettattivi kbar għal dan ix-xogħol.
Imsomma, kien sieħbi Marju li hekk kif kien wegħdni ftit jien qabel, bgħatli din il-mużika sabiex ngħaddilu erbgħa kummenti lura… Għadda xahar, xahar tal-blieh, iktar mill-ikbar ċirklu li jista jarma s-Sur Said tal-Fu*jana u fl-aħħar, illum il-Ħamis 26 ta' Jannar, bdejt nerġa nsib il-muża nikteb, le mhux dwar Franco din id-darba!
1. Ċikku ċ-Ċinkwina
Ċikku - grampun sod li faqqa ċinkwina femminili eżemplari li ħesrem inqabdu tqal bla ma ħadd kien jaf xejn! Omertà sħieħa… silenzju perfett. L-istess bħal f'ċertu stejjer traġiċi Maltin fejn twieldu leġġendi u faqqsu fatati minflok verità.
Kanzunetta bi ħsieb immensament sinjur li jixħet dawl fuq l-attitudni ta' min jaħbi jew jgħin sabiex tinħeba verità - tant li jasal iħalli lill martu tgħereq f'inkwiet kbir anki wara mewtu. L-eżempju jkaxkar, u hekk kif ulied uliedha joħorġu jixbhu lil żewġha, Lieni tispiċċa ċċedi b'attakk f'qalbha!
2. Firien(Qattus rieqed, farka ġobon ma fadalx)
Għadda ż-żmien u sforz il-qattus rieqed, il-ġurdien ħa r-riedni f'idejh. Kollox jinqaleb ta' taħt fuq; żarbun jidħak bl-iskarpan! Kultura li tgħalaq għajnejha għal kollox, sakemm tinduna li ġobon ma fadalx. Kanzunetta li titgħallem taprezza x-xogħol mirqum li fiha, wara ammont ta' smiegħ.
3. Il-Gallinar tas-Sultan
B'ħoss li naraħ jixbah lil dil-verżjoni live ta' Un Giudice u Un Oceano di Silenzio ta' Morgan, titlu kważi identiku għall-isem tat-triq fejn noqgħod, il-memorja ħelwa tat-tiġieġa vjola tiġri qalb folla entużjasta ġewwa r-Roadhouse tal-Buskett lura f'Lulju tal-2009 u s-sarkażmu sottili u mexxej f'dan il-kapulavur ta' ritmu u melodija – huma kollha ngredjenti li jġegħluni nħobb wisq din il-biċċa xogħol.
Mera tas-soċjetà… li nara ppersonifikata fil-kanarin li jieħu lezzjonijiet tal-kant mingħand kokka xiħa b'widnejn twal u toga qasira – li tfakkarni fil-logo tal-KSU fl-Università. Gallinar soċjalment attiv ħafna fejn tiġieġa li la hi ħamra u lanqas blu, issib ruħha ma tistax ittir sforz persunaġġi oħra li jimbuttaw flieles taħt qroqqa u li għandhom rispett lejn il-ħotbi qaddej tas-Sultan!
Mument ieħor fejn Marju, ta' Brikkun li hu, irrakkonta realtà politika Maltija f'metafora mimlija rix u folol għalażobbhom.
4. It-Tnejn
Ritmi għaġġelin, li bi skuża tal-ħajja mgħaġġla tat-Tnejn filgħodu, jirrakkuntaw karattru li jikkunsidra lilu nnifsu bħala tellief, "qisu iblah", jintilef f'ħafna ħsieb, jittama li jerġa lura taħt friex sħan ma' dik li tant ħabb. Iżda l-ħolm spiss jintemm ħesrem b'xi tpaqpiqa li taħsdek fost il-ġenn tat-Tnejn filgħodu. Kważi lanqas tinduna li huwa inti il-"mitluf" u mhux ix-xiħ jitkellem mal-kelb! Tgħid it-tapizzerija terġa tieħu l-kulur tagħha?
5. Kunsenturi
Il-Ħanina! Anki fl-iktar binja b'saħħitha, l-aqwa tikħilha, tilmaħ kunsentura!
Anki l-età hija kawża ta' kunsenturi fiżiċi.
U hekk hu l-ħajja li ħafna drabi huwa l-bniedem stess li joħolqilha kunsenturi meta jħarbat sistemi naturali milli jgħixu kif mitlub lilhom. U hekk hu naraw lis-seqer, liebes ta' bufula, iżoqq lill-brimba!
6. Il-Maħbuba l-Midruba
Ħoss ta' kitarra jakkumpanja din il-kanzunetta melankonika għall-aħħar, mill-bidu sat-tmiem. B'referenzi bibbliċi kemmxejn evidenti, nisimgħu dwar dan il-karattru ta' maħbuba midruba, tokrob fis-sirda – nistħajjilha tirrappreżenta lill-ħajja li ta' kuljum tfakkarna li kollox u kulħadd għad jerġa jsir trab.
7. Irkotta
Rakkont ħelu ta' grupp aħwa subien jixxenqu lejn mara għarkobbtejha waqt li din qed taħsel l-art! Lucy, mara b'doni li jattiraw lil ħafna rġiel u allura numru ta' nisa li m'għadhomx fil-fjur ta' ħajjithom, jgħiru għaliha! U hawn fejn titfaċċa r-risposta ħelwa ferm: "L-għalqa trid toqgħod magħha, l-għalqa trid tieħu ħsiebha!"
Innu għal pubertà, innu għall-maskulinità, innu għall-femminilità, innu għall-moħħ mehdi bil-kilbiet tal-ġisem.
8. Nixtieq
Kanzunetta li smajtha tindaqq fl-aħħar okkażżjonijiet fejn il-Brikkuni ħarġu "live" u spiċċajt ninnamra magħha sa mill-ewwel mumenti. Bħal ġuvni li jixref fuq Facebook sabiex jinnota xi tfajla gustuża u qalbu tħabbat mija mija meta jiltaqà magħha l-ewwel darba. L-istess jien u "Nixtieq".
Kanzunetta li ġġib il-għira lil kull ħassieb u lil kull poeta. Kanzunetta li kważi teżawrilhom il-vokabularju tal-ħolm tagħhom u tirrakkuntah qabilhom!
Kanzunetta li l-aġġettivi għaliha ma jinstabux kollha fl-edizzjoni tad-dizzjunarju komplut ta' Aquilina għaliex għadhom ma ġewx ifformulati.
Kanzunetta li tħeġġiġni nkompli noħlom iżda li tfakkarni li kultant ħolma taf tkun taħżiża fl-ilma. Kanzunetta li tħeġġiġni nonfoħ bżieżaq tas-sapun u niġri f'nofshom għal għonq it-triq iżda teħodni wkoll f'realtà fejn dawn il-bżieżaq huma fraġli u dlonk jispiċċaw biss tifkira.
Fix-xenarju tal-ilsna tan-nar jibilgħu Strada Rjali nixtieq jien ukoll inpitter dax-xejn tal-llum, jien u nikteb.
10. Sigrieti
Mas-suffara tal-kitla tgħali, forsi quddiem belà tè u mużika b'ritmu mexxej, nidħaddtu dwar is-sigrieti – parti ntegrali mix-xibka soċjali maltija. Għal darb'oħra nisimgħu kliem li b'ironija meqjusa, jiġbed is-saqajn lejn kultura li tgħallimna ngħixu f'dubji mhux f'ċertezzi. Iżda l-kor ifakkarna li din "kultura tal-gidba għal ġid", frott il-velenu f'ħalq il-lifgħa ta' Sawlu li ntiret biss minn numru ta' nies qarrieqa.
11. L-Uffiċċju
Fil-bidu meta smajtha, fiż-żmien meta ġiet sottomessa għal Festival tal-Għanja tal-Poplu, ma tantx kont impressjonat b'din il-kanzunetta. Niftakarni xettiku ħafna dwarha. Illum li erġajt smajtha fil-kwiet ta' kamarti għal darba, tnejn, għaxra, nammetti li bqajt affaxxinat bir-rakkont li jseħħ hawn; rakkont ta' raġel malti li mxebbgħa minn xogħolu, jirrakkonta l-madwaru, il-geddum tal-imgħallem qabel jitlaq lura d-dar wara sahra twila.
U hawn fejn tinbet il-fantasija tal-awtur li jilgħab mal-ħolma ta' ħajja li ma tintrabatx mas-sistema kiefra tax-xogħol fejn il-bniedem huwa potenzjal mekkaniżżat, f'ġieħ il-profitti.
12. Żonqor
Naslu lejn l-aħħar. Fl-aħħar! Ħin fejn nisimgħu lil Danjeli jwerżaw u allura fejn nistgħu naqbżu kollha f'daqqa mar-ritmu tat-trombi u trumbetti.
Kanzunetta li tistaqsi l-valuri bażiċi fostna l-Maltin waqt li Alla jiżfen ma' marċ militari. Tistaqsi t-twemmin popolari tal-medja, tal-politika u tar-reliġjon - ir-rgħajja twajba li xorta jġorru bastun!
Fl-aħħar hemm ċans issib ruħek eżawrit; jew għax żfint iżżejjed jew għax skoprejt li int ukoll għandek xi valur li tajjeb tindirizza!
13. Tiddi ix-xemx fuq din l-għodwa moħlija
Kif tista tikkummenta l-benna tal-arti? Kapulavur fil-kitba u fil-mużika, li b'seħer liema bħalu jirrakkonta sbieħ ta' jum xemxi u hiemed mill-kamra tas-sodda, fejn filwaqt li l-maħbuba tinsab rieqda, l-awtur jirrakkonta ż-żmien li qed igerbeb minn fuqu. Ninża l-kappell u ma nerġax nilbsu! 7 ta' Frar 2012 – Fadal biss 3 ijiem stennija għal famuż avveniment meta Brikkuni joħorġu bit-Trabokk fil-pubbliku. Sadattant, iktar kmieni ippubblikaw vidjo miġbud fil-librerija pubblika ta' Beltissebħ bil-protagonista Ġuże Stagno, għall-kanzunetta "L-Uffiċċju" u dan jidher li diġa sewa ta' ħatab għan-nar li qed jikber ġmielu għall-avveniment tas-Sibt.
5.20 ta' filgħodu – qed nerġa nisma "Nixtieq"… iva – nixtieq immur norqod issa, fil-fond.
12 ta' Frar 2012 – Nammetti li l-Brikkuni ma narahomx f'posthom fuq palk għoli, kemmxejn maqtugħa mill-udjenza. Biss, wara it-tieni debutt għal Yasmin Kuymizakis flimkien mal-grupp tagħha YEWS (b'James u Hagen) u t-togħma tajba li ħallew warajhom, Brikkuni, frott l-esperjenza issa twila tagħhom, ippreżentaw serata li tassew qabdet lill-udjenza ħelu ħelu ġot-Trabokk.
Serata li rat it-tmiem tagħha b'riviżitazzjoni ta' xi kanzunetti minn Kuntra Banda u b'assedju uman fuq il-palk, bi ħlejjaq umani li ma felħux ma jiċċelebrawx huma wkoll il-kbir Gadazz.
Huwa fatt krudili li fost udjenza ta' 1000 ruħ, tibqa ssib dawk il-ħafna li ma jgħamlu xejn ħlief ipaċpċu u jtellfu mill-ħafna gost tal-mużika ħajja. Filwaqt li barra nfetħu bwieb is-sema, fit-tielet sular tal-blokka l-Belt kien hemm elf ruħ jiċċelebraw ir-ritorn tal-Brikkuni fit-teatru taz-ZOO - Is-City Theatre.
Serata ħelwa mgħoddija ma nies sbieħ ħafna.
1.00 ta' filgħodu – wara diskursati ħelwin ma' varji ħbieb u persunaġġi, ngħatu daqqa t'id sabiex l-istrumenti jsibu triqthom lura lejn id-dar.
2.30 ta' filgħodu – Gerrem il-plastik, ixref fil-kummenti u hemm hi s-sorpriża finali! Sabiħ li għal darb' oħra issib ismek (u anki laqam) fuq il-kopertina ta' biċċa xogħol ta' banda Maltija. Nammetti li nħsadt imma ser norqod bi tbissima wiegħsa. Grazzi lura lill-Brikkuni.
3.30 ta' filgħodu – L'hena tiegħi ngawdi l-lejl. Issa hu il-ħin li nippubblika dan il-kumment dwar it-Trabokk. Wara tant stennija, hawn hu għalikom!
